MATAG eleksyon, sama sa sugal, dunay modaog, duna say pildero.

Dunay mga pildero sa eleksyon nga makadawat sa kapildehan samtang dunay uban nga maglisod sa pagtuo nga sila naparot.

Busa, modangop sila sa legal nga proseso pinaagi sa pagprotesta sa resulta sa eleksyon.

Click here for Election 2010 updates

Apan tungod sab ning mao nga proseso, dunay mga serbisyo o pangalagad nga mabalda.

Sama ini karong nahitabo sa lungsod sa Compostela, diin wa pa makaasumer ang napili nga mga opisyal tungod sa pagsuspenso sa Commission on Elections (Comelec) sa deklarasyon kanila nga mga mananaog.

Bisan tuod kon dunay molingkod nga officer-in-charge (OIC) sa lungsod kon motudlo na ang Dept. of Interior and Local Government (DILG), lahi ra gyud kon full-time mayor ug officials ang manglingkod.

Una, limitado ang mga gahom nga huptan sa usa ka OIC. Busa, di siya makahimo sa tanang mga gimbuhaton nga gisangon kaniya ug mga gahom nga huptan sa usa ka full-time nga mayor.

Ikaduha, kon mahitabo man nga taga gawas sa Compostela ang ibutang isip OIC, nga dako kaayo nga purohan, wa siya masuheto sa panginahanglan ug suliran sa lungsod.

Di sayon gihapon alang kaniya ang pagbuhat sa mga gimbuhaton kon itandi gyud sa tawo nga nagpuyo ug lumad nga taga Compostela.

Ning sitwasyon sa mao nga lungsod karon nga way klarong officials sugod niadtong Hunyo 30, ang nasakripisyo mao ang katawhan.

Kon molanat pag dugay ang krisis diha sa lungsod, di imposibleng mapiang ang ubang mga serbisyo alang sa katawhan.

Ang pait pa ra ba, taga Manila ang giagad kon unsay ilang hukom.Unta, ilang dalion ang paghukom ug ikonsiderar ang sitwasyon sa pagsulbad sa krisis.