PANAGBANGI sa yuta maoy gitumbok sa kapulisan sa lungsod sa Carmen nga motibo sa pagpusil patay sa kanhi barangay konsehal ug mag-uuma sa Sitio Palo Maria, Brgy. Lower Natimao-an, lungsod sa Carmen, Sugbo sa miaging kaadlawon.

Ang biktima giilang si kanhi konsehal Teresito Cruz, 53, minyo, kinsa gipusil sa wa pa mailhing mamumuno samtang mopadulong unta kini mangumpra sa merkado publiko sa lungsod.

Hinuon naglibog pag gamay ang kapulisan kay dunay armas nga napalgan sa lawas sa biktima.

Click here for Election 2010 updates

Si Cruz nakaangkon og samad pinusilan sa iyang dughan gikan sa kalibre .357 caliber revolver.

Si SPO1 Ricardo Enriquez, sa Carmen Police Station nga nahinabi sa Sun.Star Superbalita, nagkanayon nga gitinguha karon nila nga ipatawag ang usa ka 25-anyos nga lalake nga Insik, kinsa maoy gikabangi sa biktima.

Matod ni Enriquez nga duna silay record nga niadtong Hunyo 30 ang 25-anyos nga Insik ug si Cruz gihusay sa police police station.

Giingong ang yuta nga gibantayan ni Cruz nga gibilin sa iyang among Insik nga toa na karon sa China gitugyan na ngadto sa 25-anyos nga pag-umangkon.

Sumala ni Enriquez nga nireklamo ang 25-anyos sanglit di na mohatag og insaktong bahin ang biktima, ingon man ang mga lubi nga tinanom gipangputol niini hinungdan nga giingong pasakaan og kasong theft ingon man sa kalapasan sa Philippine Coconut Authority (PCA) law ang biktma.

Siya niingon nga base sa ilang nadawat nga impormasyon nga siko kaayo ang kanhi brgy. official sa ilang lugar ug gikatahong dunay mga gikabangi.