DAKO kaayong pangutana sa oposisyon kon bahinan ba gyud sila sa administration councilors sa dakbayan sa Talisay sa mga komitiba sa konseho.

Nitumaw ang mga huhungihong nga di gyud mabahinan ang duha nga sila si Konsehal Romeo Villarante ug si Konsehal Danny Caballero nga nanaog sa eleksyon ubos sa Liberal Party (LP).

Si Villarante nga usa ka abugado nagtinguha nga ihatag kaniya ang pagka chairman sa committee on laws.

Click here for Election 2010 updates

Nagtuo ang konsehal nga mas haum siya sa maong komitiba tungod kay balaod ang tun-an niini.

Samtang si Konsehal Caballero gusto sab nga huptan ang committee on sports tungod kay duna man siyay taas nga kasinatian sa maong natad.

Kasaligang tinubdan sa City Hall nagbutyag sa Sun.Star Superbalita nga lakip ang kauban sa administration councilors nga si Konsehal Val Ylanan way komitiba.

Giingong gikonsiderar si Ylanan nga di na sakop sa administrasyon.

Apan si Ylanan nga nahinabi sa Sun.Star Superbalita nihimakak nga di na siya sakop sa administrasyon.

Sa pangutana kon mahatagan ba siya og komitiba, wan a hinuon mokomentaryo ang konsehal.

“Gipili man ta sa mga Talisaynon, moserbisyo ko mahatagan man og komitiba o dili. Akong ipadayon ang akong gisaad nga serbisyuhan sa kamatinud-anon ang atong katawhan,”matod sa konsehal.

Si Mayor Soc Fernandez maoy nasubling napili sa Talisay.