NILANDING sa balay tambalanan ang usa ka lalaki human gipusil sa polis kagahapon mga alas 2:00 sa kadlawon sa Barangay 22, Osmeña Extension ning siyudad sa Cagayan de Oro.

Giila ang biktima nga mao si Ronald Paghubasan, 41, minyo, sa susamang dapit.

Gitumbok nga namusil niini mao si SPO1 Agustin Labininay, sakop sa Police Station 3 (PS3) sa Agora samtang sakay sa mobile patrol.

Laing nireklamo atol sa insidente usa ka Julius Dumanat, 27, minyo, taga Barangay 22 human gitionan og pistola sa laing polis nga mao si SPO1 Nestor Maestrado sakop gihapon sa PS3.

Si PO2 Rodrigo Reyes sa PS3 nga kauban sa night shift sa duha nisaysay sa Sun.Star SuperBalita nga walay intensyon ang maong polis sa ilang gibuhat.

Gisaysay niini nga mga alas 11:23 sa gabii niadtong Sabado adunay silay nadawat nga tawag gikan sa Gusa tungod sa usa ka lalaking nagpabuto og armas ug dihang girespondehan nasikop ang usa ka Diamael Hadji Mustapha-Palo, 40, minyo, taga #093 Purok 4A Gusa kinsa armado ug kalibre .45 ug gituohang naka-inom.

Apan ang mirespondeng polis nga mao sila si SPO1 Labininay, SPO1 Maestrado, PO3 Jhonny Quintos, ug PO3 Chrsitopher Mabalos nakamatikod sa suspek nga magsige og tawag sa iyang cellphone nga gituohang magpatabang.

Dihang gihatod si Palo sa Maharlika Detention Cell ug pag-uli sakay sa mobile patrol namatikdan nilang adunay sakyanan nga misunod kanila nga gituohang sakop ni Palo.

Paghidangat sa Osme¤a nga bahin nakita nila si Paghubasan nga nagkaway sa iyang kamot ug giingong gipara ang mobile patrol.

Sa pagtuong kauban kini ni Palo deretsong gipusil ni Labininay ang tiil niini hinungdan sa pagkaigo ug pagkaligid.

Miduol sab niadtong tungora si Dumanat tungod sa pagpusil sa biktima apan gitionan kini og pistola ni Maestrado ug giinnan nga "unsa man apil ka?"

Matud ni Reyes nga andam nga moabaga sa galastuhon si Labininay ning panahona samtang giingong andam sa pagreklamo ang pamilya sa biktima nga anaa karon sa Northern Mindanao Medical Center (NMMC).