DUHA ka mga managlahing insidente sa kadalanan nga mikalas og kinabuhi ang natigayon niadtong Sabado ning siyudad sa Cagayan de Oro.

Unang insidente niadtong Sabado mga alas 3:45 sa kadlawon sa Vamenta Boulevard, Pelaez Avenue, ning siyudad.

Nakabsan sa kinabuhi ang batan-ong driver nga mao si Aaron Jay Baliga, 16, tinun-an sa Misamis Oriental General Comphrehensive High School (MOGHCS) samtang kritikal ang kahimtang sa higalang si Arnel Claunan, 14, pulos mga mulopyo sa Barangay 15, Del Pilar-Macahambus St., ning siyudad.

Namatikdan nga naka-inom ang mga batan-on dihang nagmaneho sa motorsiklo nagdala og plaka KS9583 ug tungod sa kakusog sa pagpadagan mibangga sa island ang motorsiklo hinungdan sa paglagpot niini.

Girespondehan ang insidente sa kapolisan sa Police Station 4 (PS4) ug nakitang nagubuy-od na nga nagkadugo ang mga biktima.

Si Baliga nanggawas ang dugo sa dalunggan gawas pa sa gisuka niini samtang nabunal ang ulo ni Calunan sa semento.

Gipangdala ang mga biktima sa Northern Mindanao Medical Center (NMMC) apan si Baliga nakabsan sa kinabuhi usa ka oras ang milabay.

Sa pagsulat ning balita, nagpabiling talandugon ang kahimtang sa higalang si Claunan.

Samtang laing duguong insidente sa dalan natigayon niadtong Sabado mga alas 8:00 sa buntag sa Kauswagan Junction, Marcos Bridge ning siyudad sa Cagayan de Oro.

Dead on the spot ang biktima nga mao si Wilson Go, taga Barangay 26, ning siyudad.

Nasayran nga pauli na sa puloy-anan ang biktima sakay sa gimanehong motorsiklo dihang kalit lang nga nawad-an sa manibela ang usa ka ten wheeler truck nga gimaneho ni Emmanuel Lamoc, 31, minyo, lumad nga taga Lanao del Norte.

Ang asawa sa biktima nga nahinabi sa Sun.Star SuperBalita dili pa makadawat sa nahitabo sa iyang bana.

Nasayran gikan sa asawa nga nipaingon ngadto kang Go ang ten wheeler truck human nawad-an og preno hinungdan sa pagkaligid usab sa truck nga kargado og mokabat 300 ka sako nga mais.

Gawas sa nadat-ugan pa og mais ang biktima, nalatayan pa kini sa ligid hinungdan nga diha dayon nakabsan sa kinabuhi.

Ang driver unang mitahan sa Police Station 2 (PS2) sa Cogon apan giturn-over sa Maharlika Detention Cell pinaagi sa imbestigasyon sa Roads and Traffic Administration (RTA).

Ang patayng lawas ni Go gihaya ning panahona sa Cosmopolitan funeral chapel.