NAALARMA ang katawhan sa Davao tungod sa pagdaghan sa ihap sa mga tawo nga naapektuhan sa dengue fever.

Nikabat na'g sobra 1,300 ang nagsakit og 14 ang namatay sa Davao region nga dala sa Aedes mosquito gikan sa Enero niining tuiga.

Ang akong kwatro anyos nga anak nabiktima na usab og karon anaa sa tambalanan human ang iyang inahan na-ospital niadtong niaging bulan.

Makalilisang kining sakita kay wa pay tambal kondili daghang tubig, dextrose kun galuya ang pasyente, dugangan og blood platelets kung moubos pag-ayo ngadto sa 20 diin ang normal kay 150-250 o kaha mga herbal nga tambal sama linaga nga tawa-tawa, galay sa kamote ug pagkaon og durian.

Para kanako angayan nang tawagon nga epidemiya ang maong sakit tungod sa pagkakusog nga pagkuyanap niini. Bisan giunsa namo pagpanglimpyo sa among lugar, di gayod masumpo ang mga lamok nga nagdala og dengue kung dili tanan moapil sa paghinlo.

Para kanako, morag bugoy nga tawo ang Aedes mosquito nga kung painumon og bahal dili mahubog, kung pakan-on dili mabusog, kung hilo-an molingo-lingo lamang, og kung kulatahon mo-tenk yo pa!

Mao nga nalipay ako sa giluwatang pamahayag ni Dr. Leopoldo Vega sa SPMC ug opisyal sa DOH nga may bakuna na para sa dengue og usa ang Davao nga himuong testing area.

Usa gyud ko nga moapil sa linya aron malikayan ang dengue nga hastang gastoha ilabi na kung magdugo na ang pasyente og kinahanglang abunohan og dugo. Busa nakita ko ang kabililhon sa pagdonar og dugo sa mga blood letting sa DOH ug Red Cross kay seguradong may dugo para sa donors ug ilang pamilya kung gikinahanglan.

Kagahapon nag-text ang akong higala nga nangita'g dugong Type A+ para sa iyang apo nga na-dengue usab og nagkinahanglan og blood platelets.

Mabuhay si Presidente Noynoy!

Sa katapusan may bag-o na gayod kitang presidente. Human na ang mga batikos ug birada kaniya nga dala sa piniliay, panahon nang maghiusa kita aron magmalampuson siya sa iyang tahas sa pag-usab sa nasud.

Maghiusa usab kita sa pag-ampo sa iyang kalampusan, sa maayong panglawas, og maayong mga desisyon nga dala sa panginahanglan sa katawhan, ilabi na sa mga kabus og timawa, ug dili sa mga tigsulsol sa iyang palibot alang sa ilang kaugalingong katuyoan lamang.

Hatagan nato siya'g kumpiyansa nga tumanon niya ang iyang gisaad sa panahon sa eleksyon og paminawon niya ang mga mulo sa katawhan nga nangayo og tabang sa gumonhap sa ilang kinabuhi karon.

Sa laing bahin, atong klaruhon nga di tanang problema sa tawo matubag sa paglingkod ni Aquino sa Malaca¤ang. Nagkinahanglan usab kita nga molihok, mobayad sa saktong buhis, dili magpabug-at sa gobyerno.

Hinumdumi nga sa matag tudlo nato sa tawo nga nagbuhat og dautan, tulo ka tudlo usab ang nagpunting sa atong kaugalingon. Kung dautan ang dagan sa atong pulitika karon, seguradong apil kita sa pagkahimo niining dautan tungod sa atong pagpasagad og pagkamanhid sa panghitabo sa atong palibot.

Matud pa sa kanta ni Joey Ayala, "ang sakit sa kalingkingan ay dama ng buong katawan."