UNOM ka mga miyembro sa usa ka pamilya nangahilo human sila mikaon og uhong, alas 12:20 sa udto, Sabado, didto sa probinsiya sa Sarangani.

Mga biktima gilangkuban sa asawa nga si Laurabelle Pag-ong, 30, bana niini nga si Tonton, 35, mga anak nga sila Genevieve, 11, Jobert, 9, Eva Mae, 5 ug Rubi Jean, usa ka tuig nga pulos nagpuyo sa Alegria, Alabel, Sarangani Province.

Sumala ni Laurabelle, ang uhong nga gitunoan maoy ilang gituohan nga hinungdan sa ilang pagkasakit.

Sumala pa nga giluto nila alang sa paniudto ang uhong nga gibutangan og tuno sa lubi.

Apan, wala pa sila mahuman og kaon, kalit lamang nga nangaluya, nagsuka suka ang tibuok banay.

Dugang sa inahan nga ang uhong mitubo sa punoan sa lubi nga maoy gikuha sa iyang anak nga si Genevieve, dayon giluto.

Maayo na lamang nga daling natabang ang mga biktima ug nadala sa ilang mga silingan sa General Santos District Hospital.

Sa pagka karon luwas na sa makuyaw nga kahimtang ang mga biktima. Gisuta na sab sa Department of Health kun ang gikaon ba gyud sa pamilya ang nakahilo kanila. (Edgardo Fuerzas)