USA ka floor manager sa usa ka balay kalingawan gipusil ug napatay sa wa mailhing mga suspek sulod sa usa ka videokihan, didto sa Purok Bayanihan, Barangay Magugpo West, dakbayan sa Tagum, Biyernes sa gabii.

Nailhan ang biktima nga mao si Joseph Toralba, 29, ug molupyo sa Sityo Acasia, Barangay Tubod, lungsod sa Carmen, Davao del Norte.

Sumala sa report gikan sa Davao del Norte Police Provincial Office nga pasado 10:00 sa gabi, naabtan sa mga miresponding kapulisan ang biktima nga nagkadugo sulod sa usa ka videokihan human gipusil sa wa mailhing mga suspek.

Ang biktima matud pa nahiagum og mga samad pinusilan sa iyang ulo ug ubang parte sa kalawasan sa wa pa matinong kalibre sa armas.

Gisuwayan pa og dala sa Davao Regional Hospital ang biktima, apan wa na kalahutay ug gideklarang dead on arrival sa mga doktor.

Human sa pagpamusil mga suspek dayong misibat padulong sa wa matino nga lugar sakay sa usa ka motorsiklo.

Sa inisyal nga imbistigasyon ni PO3 Dindo Budiongan nasayran nga naglingkod ang biktima sulod sa videokihan sa dihang gisulod sa usa sa mga suspek ug gipusil.

Kapulisan sa siyudad sa Tagum mihimo na karon og dugang pakisusi sa hitabo. (Marvin Pineda)