NAKURAT ang siyete anyos nga batang babaye human makita ang inahan nga wa nay kinabuhi samtang nagbitay sud sa ilang lawak.

Ang biktimang si Jenny Cabacoy, 35 anyos, minyo, ug gihulagway nga nagpakamatay pinaagi sa paghikog gamit ang extension wire.

Nahitabo ang insidente mga alas 8 sa buntag, Biyernes didto sa Purok 5, Barangay Ihan, lungsod sa Kiblawan, Davao del Sur.

Pwerteng siyagit sa anak sa biktima dihang napalgan ang inahan nga may hikot sa liog ug wala nay kinabuhi.

Si PO3 Allan Dave Parantar, kuyog sa iyang mga kauban nga nagsusi sa insidente, nihulagway nga usa ka kolor puti nga electric wire gibanabana nga anaa sa 486 sentimetros ang gitas-on ang gigamit sa naghikog nga inahan.

Kapulisan nga nitangtang sa wire nagkanayon nga nilagum gyud ang liog sa biktima nga hayan hinungdan sa iyang hinanali nga kamatayon.

Sa ilang pagsukit-sukit didto sa lugar, nasayran nga may problema sa pamilya ang biktima.

Luyo niini, ipailawom gihapon sa otopsiya ang patayng lawas niini aron masuta kun wala bay foul play sa iyang kamatayon.

Susihon sab sa Women and Child Protection Desk (WCPD) kun wa ba na-trauma ang anak nga si Natalie aron gilayon kining ipailawom sa debriefing tungod sa iyang nasaksihan sanglit anaa pa kini sa hingkod nga pangidaron.

Wa hinuon, nahiapil sa report sa kapulisan kun hain ang bana sa biktima atol sa insidente. Mao na kini ang ikaduhang kaso sa paghikog sa Davao del Sur karon lamang nga bulan, diin una niini nahitabo didto sa Matanao. (Dondon Dinoy)