DUHA ka mga tawo ang gikatahong namatay human sila gipusil sa managlahing insidente ug lugar dinhi sa siyudad sa Davao niadtong Sabado.

Ang usa ka biktima napusilan tungod kay nanghasi sa iyang mga kauban nga pasiyente sa Southern Philippines Medical Center (SPMC) samtang ang usa gipusil sa wala mailhing mamumuno samtang nagduwa og hantak didto Barangay 26-C Poblacion, siyudad sa Davao.

Si PO3 Timothy Manlatican sa Buhangin Police Station nag-ila sa napusilan nga pasiyente nga mao si William dela Peña, 49, minyo, ug nagpuyo sa Delos Arcos Apartment, San Vicente, Barangay Buhangin.

Matud ni Manlatican nga ang biktima nakaangkon og duha ka mga samad pinusilan sa iyang paa dihang gihasi niya ang mga pasiyente lakip na ang nakapusil nga si Jail Office 1 Rogelio Francisco Go Jr., 33, sakop sa Bureau of Jail Management ang Penology (BJMP) ug nadestino sa Davao City Jail.

Sa inisyal nga imbestigasyon sa kapulisan, sa wala pa mahitabo ang insidente, gitambalan ang biktima didto sa third floor (medicine ward) tungod sa sakit sa kidney, apan nasuko siya ug didto iyang giibot ang catheter dayon gipanghasi ang mga pasiyente.

Si Dela Peña giingon nga gibadlong ni Go kinsa didto sab sa maong tambalanan sanglit nagbantay sa piniriso nga si Ruel Nacario tungod sa sakit nga asthma.

Mga nakasaksi nagbutyag nga inay mokalma ang biktima, iya hinuong giatake si Go hangtud nga naduot ang nauwahi sa bongbong sa hospital mao nga iyang napusilan sa paa.

Bisan naigo na ang biktima, suma sa report, nagpadayon sa pangpanghasi mao nga gitabang siya ug gidala sa emergency room ug lima ka minuto ang milabay namatay ang biktima, suma ni Dr. Ivan Flores.

Giklaro nga dili bala sa armas ang namatyan sa biktima apan tungod sa komplikasyon sa iyang sakit nga gibati niadtong higayona.

Si Go kinsa nakauniporme niadtong higayona dihang nahitabo ang krimen, boluntaryong mitunol sa iyang armas nga .45 kalibre nga pistola lakip ang lima ka buhing bala sa mga pulis.

Ang suspetsado gidala sa kapulisan didto sa detention cell sa Davao City Police Office (DCPO) ug kagahapon sa buntag gidala sa PNP Crime Laboratory alang sa paraffin test.

Samtang ang laing biktima kinsa gipusil sa alas 8:30 sa gabii mao si Jerol Napalit, 18, ulitawo ug nagpuyo sa Juan Luna Extension, Barangay 26-C Poblacion.

Si PO3 Jeremias Cunanan sa Sta. Ana Police Station nagbutyag nga kalit giduol ang biktima sa duha ka wala mailhing tawo samtang nagduwa og hantak.

Matud ni Cunanan nga usa sa duha ka tawo ang mipusil sa biktima tulo ka higayon gamit ang .22 caliber pistol base sab sa baseyo sa bala nga ilang nahipus didto sa crime scene.

Si Napalit giingon nga nakaangkon og samad sa iyang ulo ug likod hinungdan nga gidala siya didto sa SPMC apan dimalas kay gideklara siya nga dead on arrival sa mga doktor.

Si Police Senior Inspector Ranulfo Cabañog, hepe sa Sta. Ana Police Station, nagmando na sa iyang mga sakop nga susihon ang motibo ug sikupon ang mga mamumuno sa biktima. (Alger Dura)