SIYAM ka mga Pinoy ang nakaabante sa round-of-32 apan tulo sa labing pambato sa Pilipinas nga sila si Efren "Bata" Reyes, Dennis "Robocop" Orcollo ug Lee Vann "The Slayer" Corteza ang nanamilit na sa miaging adlaw sa 2010 World Pool Championships (World 9-Ball) sa Doha, Qatar.

Giila nga greatest player of all time, si Reyes nahiagom sa masakit nga kapildihan batok kang Johnny Archer sa USA, 10-11, sa ilang engkuwentro sa round-of-64.

Click here for Election 2010 updates

Unya si Orcollo, 2010 World Pool Masters champion, gipakaging ni Bruno Muratore sa Italy, 8-11, samtang si 2010 US Open 10-ball king Corteza gipukan ni Tony "Tornado" Drago sa Malta, 7-11.

Ang laing mga Pinoy nga nanamilit na sab mao sila si Joven Alba, Antonio Gabica, Israel Rota, ug Allan Cuartero.

Nagpalagpot kang Gabica mao si Craig Osbome sa Great Britain, 4-11, si Rota gibuntog ni Jason Klatt sa Canada, 8-11, si Cuartero gitipi ni Nick Van Den Berg sa Netherlands, 6-11, samtang si Alba gipildi ni Shane Van Boening sa USA, 7-11.

Ang mga Pinoy nga nakaabante gipangulohan nila ni kanhi double world champion Ronnie "Volcano" Alcano ug Francisco "Django" Bustamante.

Gipalagpot ni Alcano mao si Muhammad Zulfikri sa India, 11-6, samtang ang gibuntog ni Bustamante mao si Oliver "The Machine" Ortmann sa Germany, 11-2.

Nanaog sab sila si Jeff De Luna, Marlon Manalo, Antonio Lining, Francisco Felisilda, Raymund Faraon, Oliver Medenilla, ug VenancioTanio.

Sa tanang mga Pinoy nga nakaabante, si Tanio gyud ang nakahimo'g grabeng langas kay iyang gipakaging si World 8-ball champion ug ex-World 9-ball champion Ralf "Kaiser" Souquet sa Germany, 11-9.

"Kumpiyansa pa din ako Filipino ang magkakampeon kahit pito sa labing-anim ang nalagas na. Pero s'yempre masakit ang pagkawala nila Champ (Efren Reyes), Dens (Dennis Orcullo) at Van-Van (Lee Vann Corteza)," matod ni Billiards Managers Association of the Philippines (BMPAP) co-founder Jonathan Sy sa usa ka news release pinaagi sa email.

"Ganito talaga sa 9-ball event pag suwerte ka malaki ang chance na manalo kaya may pagkakataon na masisilat ang mas paboritong player," dugang ni Sy, tag-iya sa Negros Billiards Stable.