DUNAY naghisgot nako sa mapait nga kasinati-an kaniadto sa mga mobiyahe padung sa siyudad sa Sugbo agi sa Manipis road.

Kon maghisgot ka og Manipis hilabihan gyung nipisa sa karsada nga daw gihiwa sa kilid sa bukid. Wa pa man kaniadto ang Naga-Uling road ang Manipis ray bugtong nagtakdo sa Toledo City ug sikbit nga mga lungsod ug ang dakbayan sa Sugbo. Way laing kaagian gawas sa gubaon sab kaayo nga karsada kaniadto agi sa lungsod sa Aloguinsan nga puwerte sab layo-a. Ang CBC ug Corominas buses mao ang sagad nakong masakyan kauban sa akong Lola Manol nga magtumod og itlog sa Taboan.

Click here for Election 2010 updates

Sa akong kasinatian makaingon ko nga di hitupngan ang kakulba nga bation sa mga pasahero nga moagi sa maong karsada. Apan makaingon sab ko nga di hibintahaan ang mga driver sa bus nga moarangkada didto. Gawas nga di aspaltado, siko kaayo ang mga kurbada mao nga usahay murag magsungag ang duha ka bus nga maatlan nga magkatagbo. Kay di man maarang, kinahanglan pa nga mo-atras kadtong nagsubida pailin-ilin asa makalusot ang gikaengkwentro.

Kung mangutana mo kong kining nahitabo sa mga bus karon nasinati ba sab kaniadto. Daghan na sab ang nahug sa Manipis. Daghan na ang nangamatay sa maong karsada, apan sa akong pag-usisa mas minos kini itandi karon nga lapad og aspaltado na ang karsada.

KUMPIANSA

Sa akong pagtuo, kining aspeto sa human error mas daghan ang nakalas kay sa mechanical error. Sa ato pa sayop sa driver nganong nadisgrasya ang iyang bus. Kon sayop nag gumikan ni sa subrang kompiyansa.

Mao nga niadtong panahon nga delikado kaayo ang pag-agi sa Manipis, bisan gani karon delikado man gihapon, minos kaayo ang disgrasya kay di man gyud mokompiyansa ang mga drayber .

Hinuon ning dapit nga way delikado, daghan ang madisgrasya kay mokompiansa man ang mga drayber.

Susiha nang mga karsada nga gibutangan og abiso nga accident prone area, wa kaayo'y madisgrasya. Sa mga dapit nga giilang luwas batok sa disgrasya, daghan na hinuon ang matuwad, mobalitok og bisan unsa na lang nga matang sa aksidente nga masugatan sa mga motorista.

Mao na nga didto sa Manipis bisan kong namuwak ang mga bus tungod sa ka daghan sa pasahero nga naglabi sa mga trabahante sa Atlas, makalahos gyud sa destinasyon ang bus kay way kompinasa ang mga driver. Ang uban gud nga taga Atlas mi-retire na lang pagsigi og agi sa Manipis, apan wa gyud makasuway og disgrasya.