GIKINAHANGLAN na seguro nga ipaubos og balik sa seminar sa Land Transportation Office (LTO) ang mga drayber sa publikong sakyanan labi na sa bus.
Ang mga ngilgnig nga aksidente sa kadalanan sa lalawigan ning ulahi nga nilak-ang og kapin sa usa ka semana.
Labing ulahi sa serye sa aksidente nahitabo sa Lutopan, dakbayan sa Toledo niadtong Sabado, pasado alas 4:00 sa hapon.
Di mominos 15 ka mga tawo ang namatay dihang nibangga sa usa ka Corominas bus sa usa ka balay sa nahisgotang dapit.
Niadtong Hunyo 21, usa ka trailer truck niharos sa daghag tawo daplin sa dan atol sa piyesta sa Barangay Poog, Toledo diin upat ka mga tawo ang namatay.
Niadtong Hunyo 13, nahulog ang usa ka tourist bus sa Cebu Transcentral Highway sa Barangay Cansumoroy, lungsod sa Balamban nga nikalas og 21 ka mga tawo, kadaghanan mga Iranian national.
Samtang usa ka Ceres bus ang nabalintuwad sa norte nga bahin sa lalawigan. Hinuon, way nakalas nga kinabuhi.
Sa nag-unang duha ka mga kaso, nasuta sa imbestigayon sa mga awtoridad nga dakong kasaypanan sa drayber - kuwang sa kahanas ug kaabtik sa pagmaneho, way igong pagmintinar sa kaluwasan sa sakyanan ug pulos kusog mopadagan bisan nagmaniubra sa lisod o apiki nga dan.
Igo na. Ang LTO kinahanglan nga mohimo og dinaliang aksyon aron paglikay sa dugang masulub-ong panghitabo sa kadalanan.
Kay nigawas sa imbestigasyon ang kwestiyon sa kahibalo sa drayber sa mga lagda ug polisiya transportasyon, maayong ipaubos sila og seminar bahin sa kaluwasan sa publiko.
Di ba trabaho ninyo kini taga LTO?