PROGRAMA sa Department of Social Welfare and Development (DSWD) alang sa mga kabos nga tinun-an maoy usa sa nakatabang sa pagsaka sa enrolment sa school year 2010-2011.
Ang DSWD-7 nipahibawo nga nisaka og 72 porsiyento ang enrolment sa napulo ka mga barangay sa siyudad sa Sugbo nga maoy beneficiary sa Pantawid Pamilyang Pilipino Program (4P’s) nga magduha ka tuig na karong gipatuman.
Ang maong mga barangay naglakip sa Mambaling, Duljo-Fatima, Kalunasan, T. Padilla, Tejero, Sudlon 1 ug 2, Tagbao, Inayawan ug Sawang Calero.
Nasayran nga ang maong programa nga unang gipatuman sa miaging tuig maoy nakatabang aron maminosan ang dropout rate sa mga tinun-an sa maong mga barangay ug napabilin ang 85 percent nga school attendance matag buwan.
“Aside from the sustainability of children enrolling for SY 2010-2011, another most profound gain that can be noted is the increase in enrollment in the schools covering the ten barangays of 4Ps in Cebu City with an average increase of 72% and 62% respectively. It did not only maintain the students to enroll for this school year but it also encouraged others as well,” nagkanayon ang report sa DSWD-7.
Ang 4P’s usa ka poverty reduction strategy sa gobyerno nga maghatag og “conditional cash assistance” sa labing kabos nga pamilya nga naa sa labing kabos nga mga barangay sud sa lima ka tuig.
Makadawat sila og P500 alang sa health ug dugang P300 matag bata kon nag-edad kini og 14-anyos paubos apan maximum lang sa tulo ka bata matag pamilya.
Aron makadawat niini ang pamilya sud sa lima ka tuig, kinahanglang motuman sila sa mga rekisitos: kon mabdos ang inahan, kinahanglan kining mopaubos sa pre ug post-natal care sa mga kuwapilikadong health professional, ang ilang anak nga 5-anyos paubos kinahanglang ipa-check-up ug ipa-immunized samtang ang ilang anak nga 3 ngadto sa 14-anyos kinahanglang motungha, kinahanglan usab ang mga bata nga ipaubos sa deworming ug ang inahan kinahanglang motambong sa family planning seminar.
Dako usab ang pasalamat sa usa sa mga beneficiary nga si Rowena Erma, 13-anyos nga tinun-an sa barangay Tagbao kay nakapadayon gyud sa iyang pagtungha ug wan a magproblema pa sa iyang gastuhon sa tunghaan ug sa baon.
“Ganahan man ko moeskwela karon kay makapalit naman mi og gamit sa eskwelahan ug naa na koy pirmanente na baon,” malipayong pag-asoy pa ni Erma.
Ang DSWD, Department of Education ug Department of Health nagtinabangay karon aron pagtabang sa mga kabos nga kabataan nga makalingkawas sa ilang kalisod ug makab-ot ang mahayag nga kaugmaon.