USA ang patay ug laing usa ang samdan sa duha ka mga insidente sa pagpamusil sa managlahing dapit sa dakbayan sa Sugbo kagahapon.
Patay diha-diha si Jose Bersabal, 58, tungod sa tulo ka mga samad pinusilan sa iyang tuo ug wang dughan ingon man sa wa’ng bahin sa iyang nawong human gipusil sa wa mailhing mamumuno sa Barangay Mabolo alas 12:30 kagahapon sa kaadlawon.
Sa imbestigasyon sa kapolisan sa Homicide Section sa Cebu City Police Office, nagbutyag nga samtang ang biktima naglakaw padulong sa usa ka tindahan aron mopalit unta og sigarilyo kalit lang siya gipusil sa mamumuno.
Human sa pagpamusil, nahagba kilid sa sidewalk si Bersabal samtang ang gunman daling nisibat palayo gikan sa dapit nahitaboan.
Matod ni PO3 Ruth Violango sa Homicide Section sa CCPO nga nanghipos sila og dugang kasayuran mahitungod sa biktima aron pagsuta sa motibo sa maong krimen.
Ang lawas sa biktima gidala sa St. Francis Funeral Homes aron mapaubos sa autopsy.
Siyam ka oras ang nakalabay, usa ka teller ang nasamdan sa iyang paa human gikataho nga naigo sa saag nga bala sa Sitio Sto. Niño sa Barangay Inayawan.
Ang biktima nga si Joseph Aceboque, 31, dali nga gidala sa tambalanan gumikan sa iyang samad pinusilan sa paa.
Ang biktima kinsa nitaho sa kapolisan sa maong insidente nagtuo nga naigo lang siya sa saag nga bala.
Asoy niya nga samtang naglakaw siya paingon mopauli sa ilang balay, nakadungog siya og usa ka buto sa armas.
Pipila ka minutos, iyang nabantayan nga naminhod ang iyang paa ug didto iyang nahibaw-an nga naigo na diay siya sa saag nga bala.
Dali niya gihigtan og panapton ang iyang samad pinusilan ug sa pag-abot sa ilang balay nangayo dayon siya og tabang sa iyang asawa kinsa dali nga midala kaniya sa tambalanan. (Sun.Star Cebu)