TUNGOD sa sunodsunod nga dagkong vehicular accident sa Sugbo nga nikalas og ubay-ubay nga mga kinabuhi, magpatawag karong hapon og emergency meeting ang Regional Council for Road Safety.

Si Land Transportation Office (LTO-7) director Raul Aguilos, kinsa maoy pangulo sa regional road safety council, maoy nagpatawag niini mga alas 4 karong hapon sa Sacred Heart Center.

Click here for Election 2010 updates

Nasayran nga gitukod sa LTO-7 ang maong konseho nga gilangkuban sa mga ahensiya sama sa LTFRB, DOH, DPWH, PNP, Traffic Group ug uban pa, sa niaging tuig human usab sa aksidente kaniadto sa EDC Liner sa lungsod sa Naga diin 4 ka mga kinabuhi ang nakalas.

Gikaalarma ni Aguilos nga nagsunodsunod karon ang mga aksidente sa kadalanan nga naglambigit sa mga pampublikong sakyanan diin ang labing uwahi mao ang pagbangga sa V&JA bus sa Corominas Bros. sa Toledo City diin 15 ka mga pasahero ang nangamatay ug ubay-ubay ang nangaangol.

Matod ni Aguilos nga kinahanglang dunay himuong aksyon aron mahunong na ang mga aksidente sa kadalanan.

“I am calling all members of the regional council for road safety to attend an emergency meeting to discuss specific plan of action and strategy to ensure road safety and security of passengers specially of PUV’s in view of the recent back to back road mishaps in the region,” pahibawo pa ni Aguilos.

Ang aksidente sa V&JA maoy ikatulong duguong vehicular accident sud lang sa usa ka buwan diin ang una mao ang tourist bus nga nahug sa pangpang sa Balamban nga nipatay og 20 ka mga Iranian national ug gisundan sa pagbangga sa trailer truck sa Toledo diin ubay-ubay sad ang nangamatay.

Matod ni Aguilos nga ang ilang ahensiya uban sa LTFRB mopatuman sa samang procedure nga ilang gipatuman sa JD Transport.

Kini naglakip sa dihadihang pagsuspenso sa prangkisa samtang pending ang imbestigasyon aron mapaubos ang tanang mga sakyanan sa nahisgutang transport company sa road worthiness test ug pagpaubos sa ilang mga drayber sa drug test ug retraining.

Sa pasiunang imbestigasyon nasayran sa LTO nga moabot sa 70 ang mga pasahero sa V&JA bus nga giingong overloading na kay duna ra kini kapasidad nga mokarga og 50 ka mga pasahero.

Giingong nagbiyahe ang bus sa “abnormal high speed” samtang nagmaneho sa kurbadahon nga dapit ug nawagtangan og kontrol ang drayber niini hinungdan nga gibangga kini sa pader sa Lutopan.