GISAMPUNGAN ang baba ug gibunalan ang liog sa usa ka dalaga nga trabahante sa mall sa wala mailang lalaki mga alas 8:45 sa gabii niadtong Domingo.
Midangop sa Police Station 7 (PS7) ang 22 anyos nga biktima (pangalan gipugngan), residente sa usa ka barangay ning siyudad sa Cagayan de Oro.
Gisaysay sa biktima ngadto sa kapulisan nga pauli na siya niadtong higayona gikan sa trabaho dihang sa ngitngit nga bahin sa maong dapit usa ka wala mailang lalaki ang nibunal kaniya.
Swerte pa lamang kini kay nakalingkawas sa maong panghitabo tungod sa iyang paglugnot-lugnot ug pagpangayog pakitabang.
Gibutyag ni Police Station 7 Richie Salva sa Sun.Star Superbalita nga dili mo-file og kaso ang biktima apan andam sila sa pag-imbestigar ug pag-atiman kun ugaling mausab ang huna-huna niini. (Kris C. Sialana)