HUMAN gipukaw ni Presidenti Noynoy Aquino ang Presidential Decree 96 bahin sa "wangwang," nagkisi-kisi dayon ang mga otoridad sa pagpanakmit sa mga gadgets.
Mga otoridad murag gidaman gikan sa maayong pagkahinanok ug nanakmit dayon sa nga wangwang aron ipakita sa Presidenti nga nagtrabaho sila konohay. Apan sa nanglabayng katuigan human mibiya sa puwesto si kanhi Presidenti Marcos gipasagdan nila nga mahikatug ang balaud.
Hinuon, ang ilang kalit nga 'pagkugi' limitado lamang karon sa pagpanakmit sa mga wangwang nga gihuptan niadtong dili otorisadong mga opisyal ug indibidwal.
Murag wa pa nila gitandog ang mga kolorom nga mga behekulo nga namasahero sa lainlaing lugar dinhe sa Davao ug sa silingang rehiyon.
Kaniadto nangreklamo na ang mga lehitimo nga mga operator sa de pasaheroan nga mga van apan susama sa way nahitabo.
Molantaw ka lamang sa mga van nga naghuwat og mga pasahero sa ilang terminal makita na ang mga kolorom nga sakyanan. Daghan diha sa mga terminal ang mga sakyanan nga wa pay marka sa LTFRB nga namasahero sa lagyo nga lugar.
Kun lehitimo man ugaling sila nganong wa man tay makita nga tatak sa LTFRB sa kilid sa maong mga sakyanan sama sa ilang gibuhat sa ubang van.
Dagko ba gyud ang kantidad nga itunol sa mga operator sa mga kolorm nga mga van ngadto sa mga otoridad hinungdan nga gipasagdan lang sila?
Kun kining mg kolorom nga van nga namasahero madisgrasya, unsay mahitabo sa mga pasahero? Makapahimulos ba sila sa insurance nga dili man 'for hire' ang maong mga sakyanan?
Unta di na maghuwat ang taga-LTFRB nga maunhan pa sila sa mando unya ni Presidenti Noy, karon pa kampanyahan na nila ang mga kolorom nga sakyanan.
Kun masuta unya sa Pangulo nga gikatulgan nila kining butanga, tingali og makulob ang ilang kaldero.