NAKADAWAT na ang Southwestern University (SWU) Cobras sa pagkawagtang sa ilang labing pambato nga si Eliud Poligrates ug naglantaw na lang sila sa umaabot.

Nagkanayon si team manager Ryan Aznar nga dili na siya mohimo’g laing lakang human gibasura sa Cebu Schools Athletic Foundation Inc. (CESAFI) board ang ilang apelar kabahin sa gipahamtang nga lifetime ban ngadto kang Poligrates.

Updates on President Benigno Aquino III's presidency

“Hasol na kaayo. Tutal kahibalo man ang mga tawo sa gibuhat sa Cesafi, ilang giusab-usab ang rules para lang gyud mawala si Poligrates,” matod ni Aznar.

“Dili na sab kaayo ko makahatag og atensyon sa basketball karon kay busy na kaayo ko sa trabaho. Bahala na si coach Bong (Begontes) ana.”

Nagkanayon si Begontes nga dako gyud kaayo ang nawala kanila sa pagkawagtang ni Poligrates apan matod niya nga mokombati gihapon sila’g insakto sa 2010 Cesafi season nga sugdan karong Hulyo 31 sa Cebu Coliseum.

Gipasabot ni Begontes nga aduna siya’y pito ka mga rookie nga sa iyang tan-aw, makatabang gyud sa ilang kampanya.

“Naa ko’y duha ka mga 6’4” pero kuwang pa lang gyud og experience. Pero tan-aw nako, makatabang sila sa team,” matod ni Begontes.

Ang nakapadasig sa Cobras mao ang pagbalik sa usa sa ilang mga sinaligan nga si Clifford Maguate, kinsa wala nakaduwa sa miaging tuig tungod kay naangol ang tuhod niini.

Gawas kang Maguate, ang ubang mga karaan sa Cobras mao sila si Arrd Django, Jefferson Pria, Ritchie Jalandoni, Chris Litorja, Benito Ortuyo, Rene Pacquiao, ug Eleazar Armecin.