WA PA magkauliay sa maayong buot ang magsuong si kanhi Vice Governor Simplicio Latasa ug napili nga Vice Governor Arsenio Latasa human sa piliay niadtong Mayo 10.
Apan naglaum gihapon ang magsuon nga magkauliay sila human gibulag sa politika tungod kay parehong nidagan sa samang posisyon.
Wala nakatambong si Simplicio sa pagpanumpa sa katungdanan ni Arsenio niadtong miaging semana.
Giangkon sa magsuon nga hangtod karon wa pa gihapon sila nagkasulti human sa eleksyon.
Kahinumdoman nga dako ang kahiubos ni Simplicio sa iyang manghod sanglit wa kini niatras sa iyang kandidatura ug gi-atbangan siya kinsa nagpasubli.
"Usahay mahuna-hunaan nimo ba nga imong kadugo unya you expect nga imo untang katabang mao na hinuon ang hinungdan sa imo untang...Something ingon niana," matod ni Simplicio.
Hinuon, naglaum gihapon siya nga magkauliay og maayong kabubut-on sa umaabot nga mga adlaw isip mga igsuon.
Samtang giangkon sab ni Arsenio nga wa pa gyud sila magkita sa iyang maguwang bisan natapos na ang piliay.
"Wala pa mi magkita because immediately after the election medyo ni-bakasyon ta gamay. Pero hopefully when I assume office in the province basi magkakita na gyud mi," matod ni Arsenio.
"I just do not know when kung kanus-a gyud nang naa. Pero ah, niagi naman na, pero di lang gyud ana kadali ma-heal ba," tubag ni Simplicio.
Hinuon, gitataw ni Simplicio nga mobalik na lamang siya sa iyang negosyo human wala milampos sa iyang tinguha sa politika.
Nasaksihan sa SuperBalita nga daw si Arsenio ang mismong nakighigala pag-una ni Davao del Sur Governor Douglas Cagas, atol sa inagurasyon ug oath taking ceremony sa gobernador didto sa Davao del Sur Sports Complex niadtong Hulyo 2.
Ang napiling bise-gobernador nitataw atubangan sa katawhang nitambong nga iyang ihatag ang hingpit nga pagsuporta sa gobernador sa lalawigan.
Grabe ang pagsinukliay og mga mahait nga pung ni Cagas ug Arsenio panahon sa kampanya ug giagi pa nila sa mga radyo ang ilang paghagit og sinumbagay.
Apan nakurat ang katawhan dihang misaad og suporta si Arsenio sa kagamhanan ni Cagas.
Gipasabot hinuon ni Arsenio nga iya kining gihimo aron mahatagan ang katawhan og saktong serbisyo ilawom sa ilang pang-gobyerno. (Orlando B. Dinoy)