USA ka lalaki gipusil patay sa wa mailhing armado sulod mismo sa iyang balay samtang nakig-istorya sa iyang asawa didto sa Purok 7, Barangay Sta. Maria, lungsod sa Nabunturan, Comval Province, pasado alas 9:00 sa gabii niadtong Sabado.
Nailhan ang biktima nga mao si Arnulfo Arenza, hamtung ang panuigon, ug molupyo sa susamang dapit.
Sumala sa report gikan sa Comval Province Police Provincial Office nga didto sulod sa ilang balay ang biktima ug nakig-istorya sa iyang asawa, apan kalit nga miabot ang duha ka wa mailhing mga lalaki ug usa kanila mipusil sa biktima gamit ang wa pa matinong kalibre sa armas.
Nahiagum og samad pinusilan sa walang bahin sa iyang tiyan ang biktima hinungdan sa iyang hinanali nga kamatayon.
Human sa pagpamusil, giguyod pa sa mga suspek ang patay'ng lawas ni Arensa padulong sa kusina nga nahimutang sa ilawon nga bahin sa iyang balay.
Mga suspek dayong misibat padulong sa wa matino nga lugar human sa pagpamusil.
Kapulisan sa lungsod sa Nabunturan mihimo na og dugang pakisusi aron sayron kung kinsa ang mga suspek ug motibo sa pagpatay. (Marvin Pineda)