USA ka lalaking gikatahapang tigpayuhot og ilegal nga druga nasikop sa kapulisan atol sa gilusad nga entrapment operation didto sa Barangay San Francisco, siyudad sa Panabo, Biyernes sa buntag.
Nailhan ang dinakpan nga mao si Norbil Binaoro, 29, ug molupyo sa Purok Ubas, Barangay Cagangohan, siyudad sa Panabo.
Sumala sa report gikan sa Davao del Norte Police Provincial Office nga pasado alas 8:00 sa buntag, nasikop nila ni PO3 Relampagos ang suspek didto sa iyang giabangan nga balay sa nahisgutang dapit.
Usa ka sakop sa police auxiliary nagpakaarong-ingnong mopalit og marijuana gikan sa suspek gamit ang marked money nga P500.00.
Sa pamasin nga mokita, wa na nagduha-duha nga nakigsabot ngadto sa mga otoridad si Binaoro ug sa dihang gidawat niya ang salapi giposasan dayon siya sa mga otoridad ug gidala ngadto sa presinto sa kapulisan.
Nakuha gikan ni Binaoro ang usa ka P500 nga salaping papel nga gigamit isip marked money ug upat ka nilikit nga pinalaya nga dahon sa gituohang marijuana, usa ka improvised tooter bottle nga dunay straw ug mga shabu ug marijuana wrapper.
Sa nakuha nga report gikan sa Panabo City Police Station, nasayran nga ang suspek dugay na nga gipanid-an sa mga otoridad tungod sa pagkalambigit sa pagpayuhot og ilegal nga druga.
Gitanggong sulod sa selda si Binaoro samtang ang kasong paglapas sa Republic Act 9165 kun Comprehensive Dangerous Drugs Act ang gihikay na aron ipasaka batok kaniya. (Marvin Pineda)