USA ka sundalo samdan sa pagpamanhig sa mga rebelde alas 7:00 sa gabii niadtong Dominggo didto sa probinsiya sa Cotabato.

Sigun sa nahagpat nga taho gikan sa Tactical Command Post sa 6th Infantry Division sa Philippine Army nga nagpatrolya ang mga sakop sa 68th Infantry Battalion sa Barangay Pag-asa, Mlang, lulan sa military truck, sa diha nga kalit silang gipabuthan sa gituohang mga miyembro sa New People's Army.

Apan dali sab nga miatras ang mga rebelde human mibalos sa pagpabuto ang mga sundalo target ang posisyon sa mga suspek.

Gibutyag ni 602nd Brigade Chief Brigadier General Alejandro Estomo nga usa ka sakop sa 68th IB ang naangol. Apan dili pa nila ikabutyag ang pangalan sa biktima sa hinungdan nga wala pa makahibalo ang iyang pamilya sa kahimtang sa sundalo.

Nagtuo si Estomo nga dunay nasamdan o kaha napatay sa mga rebelde. Kini gumikan kay nagpasad ang daghang mga dugo sa lugar diin nahitabo ang pagbanhig.

Sa kasamtangan, gilusad na sa militar ang operasyon sa mga dapit nga gilubloban sa mga rebelde ilabi na sa mga hilit nga dapit sa M'lang ug Tulunan, North Cotabato ug sa utlanan sa bukiron nga bahin sa Davao del Sur. (Edgardo Fuerzas)