ANG Moro Islamic Liberation Front (MILF) mibahad nga mopasaka og reklamo batok sa militar human kini milusad og operasyon sa alas 4:00 sa hapon niadtong Dominggo sa probinsiya sa Maguindanao.

Gibutyag ni MILF spokesman Von Alhaq nga dakong sayop ang gihimo sa kasundalohan sa pagsuporta sa grupo ni Kumander Randy Karon sa Moro National Liberation Front (MNLF) sa nahitabong engkuwentro didto sa Barangay Laguitan, Datu Blah Sinsuat, utlanan sa Barangay Tran, Lebak, Sultan Kudarat Province batok kang Kumander Jing Caludtiag sa MILF.

Gipahayag ni Alhaq nga gipabuthan sa mga sakop sa 603rd Brigade sa Philippine Army, gamit ang 81 mm mortar ug 105 mm Howitzers Cannon, ang posisyon sa MILF sa Barangay Sinepak, Datu Blah Sinsuat. Sumala niya nga usa ka dakong kalapasan sa ceasefire agreement sa nagpadayong panghinabing pangkalinaw sa Mindanao ang gihimo sa militar.

Giklaro ni MILF Vice-Chairman for Political Affairs Gadzali Jaafar nga wala na lang unta nanghilabot ang mga sundalo sa kagubot tali ni Kumander Karon sa MNLF ug Kumander Caludtiag sa MILF gumikan kay personal nila kining away sa matag pamilya.

Apan gitin-aw ni 603rd Brigade Commander Colonel Ernesto Aradanas nga napugos sila sa pagpabuto sa ilang mga armas gumikan kay giapil ang peace keeping force sa militar gisulong sa mga rebelde.

Tungod niini, padayong midaghan ang mga sibilyan nga namakwet sa maong dapit sa kahadlok nga maipit sa kagubot.

Hinuon, milihok na ang GRP/MILF Ceasefire Committee, uban ang International Monitoring Team aron resulbahon ang away ni Karon ug Caludtiag. (Edgardo Fuerzas)