LABAD. Pagka dakong labad sa ulo sa tag-iya sa V&JA bus nga nawad-an sa preno samtang nagdulhog kini dapit sa Landing, Toledo city diin 15 ang patay ug daghan pa ang nanga-angol human gibangga sa drayber ang bus sa pader aron mourong.

Ang maong bus mokarga lang og 53 apan kapin sa 60 ang pasahero sa paghitabo. Matod pas drayber maayo pa ang preno sa bus sa paggikan nila sa south bus terminal apan kalit lang nawala sa dihang nagdulhog na sila sa Landing, Toledo city.

Updates on President Benigno Aquino III's presidency

Gawas sa tag-iya sa bus og drayber, ang Land Transportation Office (LTO), Land Transportation Franchising Regulatory Board (LTFRB) ug pulis dakog tu-lobagon ning klase sa panghitabo.

Nagsunod-sunod na ang disgrasya sa bus ug uban pang klase sa sakyanan. Kining klase sa panghitabo malikayan man unta kon ang atong mga ahensya sa kagamhanan miimplementar pas mga balaod ug lagda sa trapiko.

Matawag nato nga overloaded ang V&JA bus tungod kay kapin sa 60 ang pasahero nga 53 ra unta ang makalingkod. Ang problema sa negusyo sa transportasyon kay ang mga drayber mokargag sobra sa kapasidad sa sakyanan.

Kon ang atong pulis ug LTO mipatuman pa sa balaod ug lagda sa trapiko, nalikayan unta ang maong hitabo. Angayan man tong dakpon ang drayber sa bus kay misubra man ang pasahero sa iyang lingkuranan.

Gawas nga ang mga bus kanunayng sobra sa pasahero sa iyang kapasidad, ang kadaghanan sa bus drayber mga abusado pa gyud. Kusog mopadagan nga wa sa lugar nga mo-rag sila ra ang nakatag-iya sa highway. Kon badlungon dayon og suko.

Klaro kaayo nga ang atong kapulisan o LTO wa mopatuman sa lagda sa trapiko tungod kay kadaghanan sa bus nga akong makit-an pirming sobra ang pasahero sa kapasidad sa usa ka bus.

Ang LTFRB usab magsige lag dawat sa aplikasyon sa certificate of convenience (CFC) sa usa ka bus o PUJ bisan kon kini kagang-kagang na o kon sa English pa di na roadworthy.

Bisag unsang klase sa sakyanan de pasahero dinhi’s Sugbo pirming overloaded. Ma PUJ o tricycle ang mga drayber mopasakay og daghang pasahero sobra sa iyang kapasidad aron lang mokitag dali sa way paghunahuna sa risgo.

Kaniadto nagsige og pangdakop ang LTO sa mga overloaded nga PUJ sa panahon ni kaniadto LTO Dir. Periong Mendoza.

Apan karon morag wa nay lihok ang LTO aron pag-implementar sa balaod ug lagda sa trapiko.

Tanawa sa Mandaue city, ang mga tricycle nga mokarga lang og duha o tulo ka pasahero kargahan og pito. Luoy kaayo ang

motor kay moutong og andar unya makatrapik pa gyud kay ang drayber anha man moagi sa taliwa sa dalan.

Morag ang Cebu ra man ang naglahi bahin sa tricycle. Sa Tagbilaran, tulo ra ang pasahero sa mga tricyle. Sa Ilocos Norte, ang mga tricycle mugbo kaayo ug duha ra ang pasahero di pa sila moagi sa sentro sa dakbayan.

Usa sa mga tinubdan sa disgrasya sa mga sakyanan labina sa mga de psaheroan mao ang di pag-implementar sa

balaod ug lagda sa trapiko.

Dunay mga sakyanan nga dili na angayan padaganon sa kadalanan tungod kay daan ug dautan na apan gipamasaheroan lang gihapon. Nganong nagdagan pa ni ug wa gidakop, ang taga LTO ug LTFRB ra ang nakahibawo.

Dunay mga drayber sa tricycle nga gipadrayeb sa PUJ. Mao ni hinungdan nga gubot pas lukot ang atong trapiko kay kadtong mga drayber nga di makapasar kon eksaminon sa pagdrayeb nakakuha og lisensya.

Suma total, ang di ma-ong pamaagi sa atong kagamhanan usa sa dakong hinungdan sa mga disgrasya sa kadalanan. Sa mubong pagkasulti ang korapsyon sa kagamhanan maoy sad-an ning tanan.

(elespinoza53@yahoo.com)