USA ka babaye ang gipusil patay sa wala mailhing tawo samtang nagbantay sa iyang tindahan sa alas 6:00 sa gabii niadtong Dominggo.

Ang biktima mao si Erlinda Villarosa, 56, minyo, vendor ug nagpuyo sa Isla Verde, Barangay 23-C Poblacion, siyudad sa Davao.

Si SPO2 Cezar Robles sa Sta. Ana Police Station nagbutyag sa iyang spot report nga ang biktima nakaangkon og samad pinusilan sa iyang ulo nga miresulta sa kamatayon.

Matud ni Robles nga wala nabantayan sa biktima ang paghiabot sa mamumuno sanglit nag-atiman siya sa iyang paninda sa iyang Sari-sari Store.

Mga kabanay sa biktima nagbutyag sa kapulisan nga usa ka tawo ang miduol sa namatay ug walay daghan pangutana gipusil siya sa makaduha ka higayon.

Si Villarosa gisuwayan pa sa pagdala sa iyang kabanay ngadto sa Southern Philippines Medical Center (SPMC) sa pamasin nga maluwas apan dimalas kay "dead on arrival" siya sa tambalanan.

Sa spot report sa kapulisan, wala gikabutyag kung unsa nga klase sa armas ang gigamit sa mamumuno sanglit walay nahipus nga baseyo didto sa crime scene.

Dili makatuo ang kabanay sa biktima nga moabot sa ilang mahal sa kinabuhi ang kamatayon sanglit wala kini nasayran nga kaaway.

Tungod niini, gipalawman na sa kapulisan ang ilang imbestigasyon aron masayran kung unsa ang motibo sa mamumuno nganong iyang gipatay si Villarosa. (Alger Dura)