ANG disgrasya dili gyod matagna ug kalikayan. Kinsa ba gyoy magdahom nga sa usa lamang ka pagpamilok matapos na ang kinabuhi sa 15 ka mga tawo nga luwan niadtong Corominas Bus Line nga nadisgrasya niadtong Sabado sa hapon didto sa sitio Landing, Lotupan, Toledo City. Kini human mabangga ang maong bus sa usa ka konkretong pader duol sa usa ka eskuwelahan.

Patay diha-diha dayon ang mga biktima. Samtang mi-abot sa 50 ang nanga-angol. Mi-ingon ang driver nga si Diosdado Requizo nga nawad-an og kontrol sa brake ang maong sakyanan hinungdan nga iya na lang kining gibangga sa konkretong pader aron mahunong. Mihunong tuod pero daghan ang nangamatay kay natusok sa mga hard object ang ubang pasahero. Kon wala pa usab niya ibangga, daghan ang maligsan kay daghan man mga tawo sa unahan.

Updates on President Benigno Aquino III's presidency

KINSA ANG MABASOL?

Karon, kinsa naman pod ang angayan basulon ning laing dakong trahedya sa kadalanan? Sa dihang nahitabo ang Balamban tragedy diin 21 ka mga kinabuhi ang nakalas sa dihang nahagbong ang JD Tourist Bus sa barangay Cansumoroy, mibasol ang uban sa desinyo sa Transcentral Highway. Dili, matod pa, design ang maong kalsada sa mga dagko ug bug-at nga mga sakyanan. Gani gidid-an na ang pag-agi sa mga dagkong sakyanan sa maong kalsada.

Matod nila nga mas luwas agi-an ang Naga-Uling-Toledo road kay sa transcentral highway. Apan nasuta sa imbestigasyon nga mechanical defect ug human error ang hinungdan sa disgrasya sa JD bus. Buot ipasabot nga palyar ang sakyanan ug sayop sa driver nga si Jaime Batoon, kinsa mao usab ang operator sa JD tour.

SUSPENSOHON

Sa Naga-Toledo road nadisgrasya usab ang usa ka trailer truck nga nagkarga og duha ka mga vans niadtong miaging semana nga miresulta sa kamatayon sa upat ka mga tawo. Karon diha gihapon sa maong kalsada nadisgrasya kining Corominas Bus. Unsa man, dili na usab nato paagi-an og mga dagkong sakyanan ang maong rota? Dili lagi ang kalsada ang hinungdan sa mga disgrasya kon dili ang palyar nga sakyanan ug ingon man kadanghag sa mga drivers.

Unya mipahamtang kaha ang Land Transportation Office (LTO) ug ang Land Transportation Franchising and Regulatory Board (LTFRB)  og suspension sa operasyon sa Corominas Bus line nunot ning maong disgrasya sama sa ilang gihimo sa JD tour og CNT trucking? Aber, atong huwaton og aduna ba silay ngipon. Ang Ceres Bus ra ba nga nagdisgrasya didto sa Bogo City wala nila pahamtangi og suspension. Hinoon, walay patay sa maong disgrasya. (bobby@sunstar.com.ph)