DILI malikayan ang disgrasya. Sama sa kawatan sa kagabhion, motumaw lang kini nga dili nato damhon. Duha ra ka klase ang disgrasya o trahedya. Una, mugna sa kinaiyahan sama sa bagyo, linog, baha ug uban pa. Aw, kana dili ta kapugong ana. Ang laing disgrasya mao ang binuhatan sa tawo gumikan sa kadanghag ug pagpabaya. Pero kining tanang disgrasya gimbut-an sa Labaw’ng Makagagahum. Pero dili nato Siya angayan nga basulon kon mo-igo o mohapak man nato ang disgrasya.
Nakadungog na ba mo aning mga balitaa kabahin sa disgrasya? Pipila ka tuig na ang nakalabay didto sa Batanes Island, duha ra ka buok jeep de pasaheroan ang nagdagan.
Pero nahibawo mog unsay nahitabo? Nagbangga pa gyud ang duha ka jeep. Maayo na lang kay way patay. Disgrasya gyud.
BARKO/TRAK BANGGA
Bisan sa kalapad sa dagat adunay gihapoy barko nga magkabangga. Pero nakadungog na mo nga adunay barko ug trak de karga nga nagbangga? Imposible no pero tinuod ni uy ug didto ni mahitabo sa Pagadian City. Didto god sa Pagadian ang ilang pantalan pabahada o lugsungon kon gikan ka sa siyudad ug tungason kon gikan ka sa pantalan. Ang mga tricycle didto lain ang design sa ilang cab. Morag naghangad daan kay tungason man.
Dihay usa ka de karga nga mobahada na paingon sa pantalan. Sus, nawad-an man gud na og preno mao nga moderetso sa pantalan. Aw, nabangga ngadto sa barko. Mao bitaw na ang kasagaran nga mahitabo sa trak nga mawad-an og brake deretso man gyud. Makadaghan na mahitabo diri sa transcentral highway. Way maayong laki anang mawad-an og preno imong sakyanan unya palugsong ka.
ESTORYA
Alang sa mga biktima sa panagbangga sa St. Thomas Aquinas ug sa Sulpicio Express 7, daghan silag mga kasinatian nga ika-estorya. Natural masakit alang kanila ug sakit usab alang kanato nga maminaw lang. Usa sa akong na-interview nga survivor mao si Fatima Culipana, 20 anyos nga taga Compostela Valley didto sa Mindanao. Iyang kauban mao ang iyang lola nga si Cresenciana Culipana, 77, iyang mama nga si Evelyn, 50, ug ang iyang anak nga pito ka buwan nga si Ruffa Mae.
Gikan sila sa Compostela Valley paingon unta sila sa Bohol aron sa pagbisita sa ilang kabanay. Misakay unta sila sa MV Princess of the Earth sa Sulpicio lines pa-ingon sa Jagna, Bohol. Apan wala makalarga ang maong barko kay nadaot. Busa misakay na lang sila sa St. Thomas Aquinas paingon diri sa Sugbo kay modagkot unta sila sa Berhin sa Simala. Nagkatibulaag sila pag-unlod na sa barko. Si Fatima ra ang naka-survive nilang upat. Maayo nalang gani kay nakita ang ilang mga patay’ng lawas aron kahatagan og desenteng lubong. Paet ug sakit alang sa mga hingtungdan. (bobby.nalzaro@yahoo.com)
Sent from my iPad