GITUOHANG mga vigilante sa lungsod sa Balamban nipusil patay sa usa ka gituohang lider sa mga kawatan sa nahisgutang lungsod kagahapon sa kaadlawon sa Brgy. Aliwanay.
Si Andres Cubona 31, ulitawo, trisikad driver, taga Brgy. Bayong sa nahisgutang lungsod, gibuk-an sa iyang ulo sa duha ka mga mamumuno nga nag-motorsiklo og itom nga daling nisibat palayo sa nahisgutang lugar.
Si SPO3 Arvie Banate Jr., imbestigador sa kapulisan sa Balamban nga nahinabi sa Sun.Star Superbalita, nagkanayon nga si Cubona natulog sa iyang trisikad mga alas 12:30 kagahapon sa kadlawon sa may covered court sa maong barangay.
Nakit-an sa mga saksi nga niabot ang duha ka mga lalake nga nagtaptap sa nawong pulos, nag-itom og sinina giingong pulos dagkuon nga mga tawo.
Ang angkas maoy nidul-it sa pagpusil sa agtang sa biktima.
Human sa pagpamusil, daling nisibat ang mga gunman sakay sa motorsiklo.
Matod pa ni SPO3 Banate nga base sa ilang nakuhang impormasyon, ang biktima giingong maoy lider sa mga kawatan nga mga bata nga sagad manglungkab sa mga tindahan sa lungsod.
Ang mga bata maoy ningtug-an kinsa ang ilang lider sa panahong dunay madakpan.
Gawas niini, gituohang siya usab ang responsabli sa pagpakatap sa mga pike nga P1,000.
Wa hinuon nila isalikway ang posibilidad nga dunay mga tawo nga nasuko kang Cubona didto sa Bayong diin daghang tanom nga marijuana. (Guam P. Logroño)