DI na makadagan pa ang nahibiling lima ka mga bus sa VJ&A Transport human gi-serve na kagahapon ang suspension order sa ilang prangkisa subay sa pagkahilambigit sa usa nila ka bus sa duguong vehicular accident Toledo City niadtong Sabado.
Mismong sila si Land Transportation Office (LTO-7) director Raul Aguilos ug Land Transportation Franchising and Regulatory Board (LTFRB) director Benjie Go ang ni-serve sa kamandoan sa garage niini sa C. Padilla st. ug gidawat mismo sa operator nga si Dulce Gantuangco.
Subay sa suspension, ang lima ka mga bus mopaubos sa road worthiness test samtang ang mga drayber niini ipaubos sa re-training, drug test ug exam.
Hinuon bisan kon wa pa maubos sa worthiness check-up, si Gantuangco human sa aksidente sa bus nga may plate number GVG-145, nipasusi dayon sa nahibiling mga bus sa ilang mekaniko ug gipa-repair ang angayang ayuhon.
Matod ni Gantuangco nga way operator ang nagtinguha nga madisgrasya ang ilang sakyanan maong naninguha gyud sila nga mayo ang kondisyon sa ilang mga bus.
Samtang sa nahitabong laing aksidente, subli usab nga gipanawagan ni Go ngadto sa LTO ang pagpadisqualify tibuok kinabuhi sa mga drayber nga malambigit og aksidente nga moresulta og kamatayon.
Si Go sa interview sa dySS kagahapon nipahibawo nga ang paghupot og lisensiya usa lang ka pribilihiyo ug dili katungod.
“Ang driver’s license is not a right. It’s a privilege that can be taken away from a person if he deemed to be unworthy for that privilege,” nagkanayon si Go.
Samtang giangkon usab sa administrador sa Cebu South Bus Terminal (CSBT), Carmen Quijano, nga di na nila makontrolar pa o mabadlong ang mga bus nga mag-overload kon makagawas na kini sa terminal.
Giklaro gyud ni Quijano sa interview sa dyLA nga “seating capacity” ra gyud ang ilang gitugot sa matag bus ug gani ila mang ipasira ang pultahan sa mga bus kon mogawas na sa terminal.
Apan di masiguro ni Quijano kon ang mga bus di ba gyud mo-pick-up og mga pasahero inig gawas sa terminal maong iyang giawhag ang mga pasahero nga moreklamo gyud kanila batok sa mga bus nga mag-overload aron ilang mapahimangnoan.
Tungod sa sunodsunod nga aksidente, nagpatawag og emergency meeting ang Regional Council for Road Safety nga gilangkuban sa nagkadaiyang mga ahensiya sa gobyerno.
Gituki sa tigom ang mga lakang nga himuon aron kalikayan ang mga disgrasya ilabina na sa mga pampublikong sakyanan.(JECT)