TAG-IYA og internet café gituohang gitulis ug gipatay sa iyang kainom ug kanhi empleyado kagahapon sa kaadlawon didto sa ikaduhang andana sa building nga giabangan sa Lagtang Road, Barangay Tabunok, Talisay City.

Ang biktima anha magkatulganan sa usa sa duha ka mga lawak nga iyang giabangan sa Syca Real Estate Lessor bldg.

Updates on President Benigno Aquino III's presidency

Si P02 Jundave David sakop sa homicide section sa Talisay City police station niila sa biktima nga si Jermaine Gerna, 24, ulitawo, taga Inayawan,Cebu City ug maoy tag-iya sa FTL internet cafe.

Nadiskubrian ang patayng lawas ni Gerna dihang ang caretaker sa building nga si Boy Magdalunes nakakita og mga pat-ak sa dugo sa sawog ug sa bongbong ug dunay duha ka mga cartoon nga napuno sa mga accessories sa computer sama sa keypad ug mga central processing unit (CPU) diha sa hagdanan.

Daling gitawhan ni Magdalunes ang piniyalan ni Gerna nga si Aimee Lastimosa, hingkod,dalaga ug lumolupyo sa Barangay Lagtang aron ablihan ang internet café.

Didto nakaplagan ang patayng lawas sa biktima nga nagbuy-od sa pultahan sa comfort room nga dunay sobra sa napulo ka mga dinunggaban gituohang agi sa icepick.

Base sa imbistigasyon nakadlawnan og inom ang biktima kuyog sa lima ka mga batan-on.

Dihang dunay nakaila sa usa sa mga kainom ni Gerna, gipatawag kini ni David ug gidala kadtong laing duha nga kauban nga maoy gikuhaan og impormasyon.

Ang tulo nga mga lumolupyo sa Lagtang nagpanuigon og 14,15 ug 18 nitumbok nga ginganlan og Junrey ,23 nga taga Minglanilla ug laing wa hiilhing kauban ang nahibilin nga maoy kainom ni Gerna dihang namauli na sila.

Si Fred (di tinuod nga ngalan), usa sa kainom sa biktima nibutyag sa Sun.Star Superbalita nga sa ilang pagpamauli, nadunggan nila si Gerna nga nihawid nila ni Junrey ug sa kauban nga di na lang mopauli kay kadlawon na ug adto na lang

matulog.

Ang hepe sa kapulisan, Supt. Henry Biñas nibutyag nga atol sa imbistigasyon, nitumaw nga si Junrey usa diay sa mga tigbantay sa café ni Gerna ug dihang naundang,nahimong regular nga customer.

Ang kapulisan nagtuo nga gipakatug lang sa duha ka mga suspek ang biktima ug gihimo dayon ang paglungkab sa café.

Gituohang namat-an ni Gerna ang gihimo sa mga suspek hinungdan nga gidunggab kini sa bukobuko, sa dughan ug sa ubang bahin sa lawas hangtod nga namatay.

Ang tag-iya sa building nga si Christopher Abanil, hingkod , nitug-an sa Sun.Star Superbalita nga kutob lang sa alas 12:00 sa kaadlawon mangabli ang internet café apan usahay maabtan sa kaadlawon kon duna pay mga customer.

Matod ni Abanil nga ang duha ka killer posibling niagi sa atop sa pag-ikyas tungod kay wa man maabli ang main door gumikan sa pagkabali sa yawe.

May nadiskubrian ang kapulisan nga screw driver nga nabawog nga gituohang maoy gigamit sa paglungkab sa café ug t-shirt ni Junrey nga nagkadugo ug kawo nga nahibilin.Si P02 David nitug-an nga ilang gituohang motibo sa pagpatay sa biktima mao ang tulis.