KLARO pas udtong tutok, apan mao nay giingon nga ang obvious di klaro sa uban. Ang 53 nga seating capacity sa Corominas bus nga naaksidente didto sa Don Andres Mariano, Toledo City . Human sa disgrasya: 65 ka bouk ang angol ug 15 ang namatay. 65+15=80. Overloaded.

Apan dili usa ka makapangangha nga balita ang overloading, sa susamang paagi nga dili na ikahibong nga nagpabiling inutil ug korap ang Land Transpotation Office (LTO).

Updates on President Benigno Aquino III's presidency

Karon nga morag gihulmigasan ang mga hintungdang ahensya nunot sa mando ni P-Noy nga kinahanglan dakpon ang mga mowangwang nga wa tugti sa balaod, hinaot nga manakod ang maong kasibot ngadto sa lain pa nilang mga mga tahas.

Kay nasayod man kita nga duna pay daghan nga angayang tul-iron kining atong katilingban. Manghinaot kita nga mopakita na og kakugi ang mga nanarbaho sa pampubliko nga buhatan ug mohunong na og paburot sa ilang bulsa.

Apan dili maayo nga igo na lang ta sa pagpanghinaot.

Kinahanglan nga kita usab molihok. Kinahanglan atong i-report ang ilang mga kahiwian. Ato silang isumbong sa buhatan sa Ombudsman. Wala mahuman didto sa presinto ang atong obligasyon.

Ang People Power wala mahuman niadtong adlaw sa piniliay. Ato kining ubanan og konkreto nga lakang.

Kinahanglan nga mag-organisa ang mga komunidad, ang mga nagpakabanang indibiduwal, ug magtukaw kon gihimo o wala sa mga ahensya sa gobyerno ang ilang mga tahas.

Maoy saad ni P-Noy nga moalagad sa katawhan ang burukrasya.

Duna siyay katungod pagpili ug mga ligdong ug may katakus nga mga opisyal sa nagkalainlaing ahensya sa gobyerno nga moimplementar sa iyang programa sa kausaban. Sila ang mga tawo nga dili mahadlok pagpatuman sa balaod. Tapuson na nato ang adlaw sa mga tapulan ug mga korap sa burukrasya.

Wa ko magtuo nga dili matul-id ang hiwi nga sistema. Daghan lang gihapon ang mga matinud-anon diha sa gobyerno, apan daghan kanila igo na lang sa pagpakahilom tingali tungod kay ang ilang posisyon way igong impluwensya ngadto sa ilang kauban sa buhatan. Unsay mahimo sa usa ka ordinaryo nga clerk o janitor batok sa usa ka korap nga regional director?

Ingon niini ang lohika: Kung siyento porsiyento nga suportado sa presidente iyang Cabinet secretary, kung suportado ang Regional Director sa iyang Secretary, kung suportado ang provincial directors sa ilang regional director, mokinto ang mga korap ug motul-id ang kibag-an sa mga empleyado. Ug masayod lang ang bag-ong presidente nga tinud-anay nga mitrabaho ang iyang mga tinudlo kung kitang mga katawhan mohatag og feedback.

Pagmata na mo mga taga-LTO. Balaud ipatuman, period.

(birada_ruphil@yahoo.com)