Milabhag ang ambisiyon. Nasihag na ang damgo ni Puli-Pamuno Jejomar Binay. Gustong mag-Presidente sa Pilipinas. Nasigpo ang kamatuoran dihang giunhan niya si Pamuno Aquino pinaagi sa di na pagdawat sa unsay ihatag niya nga posisyon.

Sa iyang suwat kang Noynoy, iyang gipatin-aw ang tanan. Di siya makigtipon sa Pamuno kay sa pikas man siya sa sinugdanan. May katarungan. Buot siyang moipsot daan. Sa laing pagkasulti, wa siyay labot ning bag-ong administrasiyon.

Updates on President Benigno Aquino III's presidency

Aron ingnon nga duna siya trabaho, suroyon niya ang tibuok nasod alang kuno sa konsultasyon sa katawhan. Indirekta kini nga pangapampanya sulod sa unom ka mga tuig. Hinay-hinay lang, Binay.

Gitan-aw nga sayo kini nga pamulitika ni Binay. Kalayo pa sa 2016. Mamuhonan na siya daan gamit ang salapi sa kagamhanan.

Dako man og badyet ang Office of the Vice President.

Klaro, nga iya lang usik-usikan ang salapi ni Juan de la Cruz sa pakigtagbo sa katawhan nga way kapuslanan. Hain na man tong iyang gipasiatab nga "gaganda ang buhay kay Binay."

Ang nakadaot ning ubang mga pulitiko pulos lang gyud saad pamitik sa botos. Dalang pangilad. Hinuon, dinhi makapasangil si Binay kay wa man siya mosakay sa barko ni Noynoy. O kaha iya ning gituyo aron siya may katarungan.

Ang gihimo unta ni Binay mao ang pakig-alayon kang Noynoy ning dakong kaakuhan sa pagbag-o. Team worker unta siya kon naglantaw pa sa kaugmaon sa nasod.

Kining buhaton ni Binay personal ra gyud kaayo. Libot kuno sa nasod, apan alang sa kalambuan sa iyang pamulitika. Kon sabton, di gusto si Binay sa katuyoan ni Noynoy sa pagbag-o.

Daghan tuod ang nahimo ni Binay sa Makati, apan naputos siya sa anti-graft cases sa Ombudsman. Ginaingon ra ba kon dunay aso may kayo. Wa lang seguro si Binay madutli kay ngilngig ang iyang abogado.

Kon husayon kining iyang pagtalikod sa administrasyon ni Pamuno Aquino kamatuoran sa di panginlabot. Kon dunay kapalpakan ang administrasyon siya igo lang malipay. Moduot pa tingali ug mahimong mananaway.

Hinuon, katungod ni bisan kinsa ang pagsaway labi na sa hiwi nga pangagamhanan. Apan kon ikaw Puli Pangulo magpakita kag gilas sa katakos ug kait-on.

Ipaila mo nga ikaw angay nga sumusunod sa dakong kaakuhan sa pagka Pamuno. Di kay lakaw-lakaw lang. Suroy-suroy.

Aron di sad ka kadudahan nga ang imong trabaho maora ra gyud ang pag-ampo kanus-a matipok ang Pamuno.

Di sad ikalimod nga si Binay adunay dakong kasinatian sa lokal nga pangagamhanan. Siya usa ka abogado. Kanhi nakigtakos sa diktadurya ni Marcos. Paborito ni Cory Aquino. Sa ato pa, kasandigan kini unta si Binay.

(gapasan.erns@yahoo.com)