NAKALINGKAWAS sa tinong kamatayon ang usa ka school principal human mahagbong ang iyang gimanihong motorsiklo sa pangpang niadtong Lunes sa hapon sa Sitio Bihang, Brgy. Bungoyan, lungsod sa Borbon, Sugbo.

Si Joselito Presbitero, 40, minyo, principal sa Saling-it Elementary School sa Brgy. Bili, taga Brgy. Bongdo sa nahisgutang lungsod nakangkon og samad sa iyang kilay ug mga garas sa ubang parte sa lawas.

Updates on President Benigno Aquino III's presidency

Si PO3 Elfedio Mahumot sa Borbon Police Station nga nahinabi sa Sun. Star Superbalita nagkanayon nga si Presbitero gikan sa munisipyo niadtong Lunes nga nitambong sa nutrition month.

Apan sa pagpauli niini ni-anang pagkahapon, dihang niagi sa kurbada nga dulhogon nga karsada wa na niini makontrolar ang manobela sa motorsiklo (GZ-6199) hinungdan nga nahagbong sa duha ka dupa nga pangpang.

Pag-respondi nila ug sa mga kauban,gidala na sa tambalanan si Presbitero sa Sogod ug didto ilang na-abtan ug nakita ang samad niini diha sa kilay apan gibalhin sa tambalan dinhi sa dakbayan sa Sugbu.

Giklaro niini nga posibling naka-inom ang biktima human usab ilahang nabantayan nga nanimahong bino.

Gihulahulagway ni Mahumot ang maong lugar nga delikado kaayo kon kusog ang dagan sanglit pwerting dulhoguna ug likuon pa kaayo.

Gani ubay-ubay nga mga motorista ang nahagbong sa maong pangpang.

Matud pa niini nga gi-swerte lang ang principal kay wa matumong sa lawom kaayong bung-aw sa nahisgutang lugar. (Guam P. Logroño)