ANG panagduwa sa duha ka mga batang magsuong lalake niadtong Lunes nisangko sa usa ka trahedya.

Gituohang ang maguwang nga 6-anyos aksidenteng natabunan sa 5-anyos nga manghod sud sa usa ka baril nga gisudlan og tubig ug mga senina.

Updates on President Benigno Aquino III's presidency

Ang managsuon ra ang nangahabilin sa balay ka yang ilang inahan nitambong og meeting sa Parent Teachers Community Association (PTCA) samtang ang amahan nagmaneho og pampublikong sakyanan.

Mga ngan sa hingtungdan gipugngan ning mantalaan.

Ang duha ka mga managsuon nangaligo sa pagbunok sa uwan samtang ang ilang inahan didto sa ilang tunghaan alang sa usa ka meeting.

Kay hayan wa pa matagbaw sa pagkaligo sa uwan, paghiabot sa ilang balay sa Purok Lemonsito, Brgy. Umapad, dakbayan sa Mandaue, naduwa pa sa baril nga puno sa tubig ang duha.

Sa imbestigasyon sa homicide section pinangulohan ni PO2 Ryan Sarabia ug mga kauban, nahitabo kini niadtong Lunes, pasado alas 4:00 sa hapon.

Matod ni Sarabia nga ang managsuon nagduwa sa uwan.

Sa paghiabot sa ilang balay aron mag-ilis sa basa nilang senina, padayon kining nagduwa sa tinabonan nga baril nga puno sa tubig ug adunay sulod nga mga bulingong senina.

Paghiabot sa 35-anyos nga inahan sa mga bata, iyang naabtan nga nagkatag na ang mga senina.

Ang iyang 5-anyos nga anak nisulti kaniya nga ang iyang maguwang maoy nikuha ug nisulod niini sa baril.

Sa dihang giablihan sa inahan ang baril, iyang nakita ang iyang 6-anyos nga anak nga wa nay panimuot.

Ang bata daling gidala sa Mandaue City Hospital apan gideklarar sa mga mananambal nga patay nang nidangat sa tambalanan.

Gituohan nga ang manghod maoy posibleng nitabon pagbalik sa baril ug wa na makagawas ang maguwang ug wa na makaginhawa sa sulod hinungdan nga nawad-an og panimuot ug nalumos.