NILANDING sa Northern Mindanao Medical Center (NMMC) ning siyudad sa Cagayan de Oro ang usa ka lalaki human gipusil niadtong Lunes mga alas 8:00 sa gabii sa Barangay Kurbada lungsod sa Baungon, Bukidnon.

Giila ang biktima nga mao si Solomon Macalom, 32, minyo, resisdente sa susamang dapit.

Usa sa personahe sa NMMC nga nahinabi sa Sun.Star SuperBalita niingon nga nakasulti pa ang biktima dihang gihidangat sa tambalanan.

Gisaysay niini nga unang gibato ang iyang panimalay samtang nangatulog na kauban ang iyang pamilya.

Apan tungod kay sunod-sunod naman ang gihimong pagbato, nidesisyon ang biktima nga mogawas ug susihon kinsay nihimo niini, apan pagawas sa biktima sa pultahan, deretso kining gipusil hinungdan sa pagkaigo sa dughan, tuo nga bahin sa likod ug bukton.

Gituohang gamit sa pagpamusil mao ang shotgun. Wala na namatikdan ang suspetsadong daling mibiya human nagkagubot ang mga sakop sa pamilya niini sa nahitabo sa biktima.

Blanko pa ang pamilya sa biktima sa mihimo niini labina walay namatikdang gikaaway niini.

Gidala sa mga hingtungdan ang biktima sa NMMC ning siyudad kinsa padayon pang giatiman sa mga doktor bisan paman luwas na sa makuyawng kahimtang.

Ang kaso giimbestigahan na usab sa Baungon Police Station aron pag-ila sa suspetsado. (SVB)