NILANDING sa balay tambalanan ang usa driver human giposposan sa iyang pasahero ug gikawat pa ang motorsiklo niadtong Lunes mga alas 9:00 sa gabii sa Nazareth ning siyudad sa Cagayan de Oro.

Giila ang biktima nga mao si Noel Singanon, 27, taga Bontong, Camaman-an ning siyudad ug nanginabuhi isip usa ka habal-habal driver.

Si Police Senior Inspector Ariel Phillip Pontillas nga nahinabi sa Sun.Star SuperBalita niingon nga namasayro lamang niadtong tungora si Singanon ug nag-atang sa pasahero sa Divisoria nga bahin.

Duha ka mga wala mailing lalaki ang nagpahatod niini sa Nazareth hinungdan nga paghidangat sa ngitngit nga bahin kalit lang giposposan sa magahi nga butang ang ulo sa biktima hinungdan sa pagkahulog niiin gikan sa motorsiklo ug nawad-an sa panimout.

Gidala sab sa mga suspetsado ang motorsiklo nagdala og plaka 9208 KA nga kolor pula agi sa wala matinong direksiyon.

Nakitang nagkadugo ang biktima sa mga Brgy. Tanod sa dapit ug gidala sa Northern Mindanao Medical Center (NMMC).

Matud ni Pontillas nga out patient sa NMMC ang biktima ning panahona ug wala pa nakuhaan og statement.

Nagtuo ang kapolisan nga dili residente sa dakbayan ang nihimo niini labina namatikdang kasagaran sa mga nasikop nga mga suspetsado wala nanimuyo ning siyudad.

Carnapping ang miguwang motibo sa mga suspetsado sa maong insidente nga padayon pang giimbestigahan sa kapolisan ning panahona. (SVB)