NAGKALAIN-LAIN destinasyon ang padulngan sa katawhan ning panahon sa Semana Santa ug ning siyudad sa Cagayan de Oro sagad nga adtoan mao ang ang Gardens of Malasag ug Guadalupe Church nga nahimutang sa Barangay Cugman ug Barangay Tablon.
Tungod niini, ang City Health Office ning siyudad nanawagan sa katawhan labina niadtong nagpenetensya nga protektahan ang kaugalingon sa kainit sa panahon.
Dili kalimtan ang pagdala og inumon nga tubig, jacket, kalo o payong aron malikayan nga ma-heat stroke.
Gitambagan usab kadtong dunay mga hypertension nga dili na lang moapil og saka sa mga dapit nga sagad penetensyahan.
Samtang ang Philippine National Police (PNP)-Northern Mindanao adunay mga pasidaan sa katawhan nga mohimo sa ilang mga panaad sa dapit.
Si Police Chief Superintendent Agrimero Cruz Jr., kinsa PNP regional director, mipasidaan sa katawhan nga magmatikod sa ilang palibot labina diha sa ilang gipadulngan.
Sa dili pa mobiya sa puloy-anan, siguraduhon nga nakakandado ang mga pultahan ug mga bintana aron dili masalisihan sa mga kawatan.
Siguraduhon usab nga nakaibot ang mga appliance sa mga saksakan aron likay sa sunog ug maprotektahan dili lamang ang kaugalingon nga puloy-anan apan apil ang puloy-anan sa mga silingan.
Matud ni Cruz nga niaging semana pa sila milusad sa Oplan SumVa kon Summer Vacation ug ning semana santa ilang gilusad ang Oplan Semana Santa.
Panglantaw sa kapolisan sa ilang paglusad niini mao ang maprotektahan ang katawhan labina diha sa mga lugar nga daghan og mga tawo sama sa mga malls, kamerkaduhan, simbahan ug labina gyod sa mga terminal ug lugar diin gapanaad ang katawhan.
Gawas niini, ila usab gibantayan ang mga resorts diin sagad gapunsisok ang katawhan.