BANAKON nga dunay gitas-on nga dos metros gipusil patay human nanggukod og tawo didto sa lungsod sa Sta. Cruz, Davao del Sur, niadtong Lunes.
Nagkaguliyang ang mga lumolupyo sa Sitio Kinokol, Barangay Inawayan sa lugar, sa dihang gipusil ni Angelito Malipay ang banakon, gamit ang iyang de bomba nga pusil.
Sumala niya nga nakit-an niyang gigukod ang iyang anak sa bitin apan maayo na lang kay abtik siya nga nibunot sa iyang armas ug gipusil ang halas.
"Naligo siya sa busay unya nakit-an sa bitin mao to gigukod, unya wa man kaabot ang bitin," saysay sa amahan.
"Nagdali ko pagpusil kay nagtalikod man ang bitin," dugang niya.
Sumala sa mga tawo nga mao pa ang ilang pagkakita sa bitin didto sa lugar. Si barangay kagawad Roti Moral niangkon nga unang higayon siyang nakakita sa matang sa halas sa ilang dapit sanglit didto sa Compostela Valley Province lang niya nakit-an kaniadto.
"Ang among pagkahibawo ani didto lang sa Barangay Cogon sa Digos ug Bansalan naay banakon," matud pa niya.
Mao kini ang ikaduhang insidente nga adunay gipusil nga banakon sa Davao del Sur.
Niadtong bulan sa Marso, 9 piye nga banakon sab ang gipusil og de bomba didto sa Digos.
Didto sa lungsod sa Bansalan, duha ka mga banakon ang gi-display sa Bansalan police human gibalsamar sa punerarya sanglit buot nila nga makit-an sa katawhan ang itsura sa bitin ug maalerto sila.
Gi-plano sab sa gobyernong lokal sa Sta. Cruz nga i-preserba ang halas aron makita sa katawhan ang dagway sa pinaka-delikadong halas sa kalibutan. (Dondon Dinoy)