USA ka ginang gipusil patay sa iyang silingan didto sa Purok 1, Barangay Mapaca, lungsod sa Compostela, Comval Province, Dominggo sa buntag.
Nailhan ang biktima nga mao si Armelyn Adorma, 26, ug molupyo sa maong dapit, samtang ang gitudlong suspek mao ang silingan sa biktima nga si Jose Tambulian, 34.
Sumala sa report gikan sa Compostela Municipal Police Station, pasado alas 10:15 sa buntag ang biktima, gipusil sa suspek gamit ang wa pa matinong kalibre sa armas.
Si Adorma nahiagum og samad pinusilan sa kilid nga bahin sa iyang lawas ug gidala sab dayon sa St. James Hospital sa susamang lungsod.
Apan tungod sa grabeng samad nga nahiaguman sa biktima, gibalhin siya sa Compostela Valley District Hospital.
Wa na kalahutay ang biktima ug nakabsan sa iyang kinabuhi samtang giatiman sa mga doktor sulod sa ospital.
Ang suspek wa na makita kay misibat human sa pagpamusil.
Sa inisyal nga pakisusi sa mga otoridad nasuta nga posibling bangi sa pamilya ang motibo sa pagpusil.
Kapulisan mihimo na og dugang imbestigasyon. (Marvin Pineda)