USA ka drayber sa de pasaheroang multicab gipusil, patay sa alas 6:30 sa gabii niadtong Lunes didto sa probinsiya sa Maguindanao.

Ang kapulisan nag-ila sa biktima nga si Samrod Acas, 43, minyo ug molupyo sa siyudad sa Tacurong.

Sigun sa taho gikan sa Maguindanao Police Provincial Office nga namasahero si Acas gikan sa Sultan Sabarongis. Apan pag-abot niya sa utlanan sa Lambayong, Sultan Kudarat Province, giatngan siya sa duha ka wala mailhing tawo ug gipusil gamit ang kalibre .45 nga pistola.

Patay gilayon ang biktima nga naigo sa iyang dughan, tiyan ug ulo samtang ang mga mamumuno dali nga misibat sakay sa XRM nga motorsiklo paingon sa Maguindanao.

Si Amzalie Arongga, usa sa mga pasahero sa biktima, nagsulti nga una gipusil ang drayber, nagkalalis pa sila sa mga suspetsado.

Dako ang pagtuo sa mga kabanay sa biktima nga posibleng dunay kalabutan sa away sa yuta ang hinungdan sa hitabo.

Apan ang kapulisan padayong nagsusi sa tinuod nga motibo sa insidente aron nga mailhan ug madakpan ang mga suspetsado. (Edgardo Fuerzas)