NIBALIK pag-usab kining grupo sa budol-budol human duha ka managlahing insidente ang natigayon ning siyudad sa Cagayan de Oro.
Unang hitabo niadtong Lunes sa Divisoria ning siyudad diin ang biktima mao si Feliciana Mero-Crances, 45, minyo, taga Barangay Canitoan ning siyudad.
Gisaysay sa biktima nga duha ka mga babaye ang nihanyag kaniya og duha ka mga mahalon nga kwentas nga gisulod sa jewelry case niini.
Tungod kay mahilig usab og mga alahas, gisusi kini ug nakumpirmang mahalon gyod. Naaghat ang biktima sa pagpalit niini sa kantidad nga P6 mil labina nga gi-offer kini sa duha ka babaye sa mubo lamang nga presyo.
Apan nakurat pag-ayo ang biktima dihang nakalakaw na ang duha ka babaye ug wala sa sulod sa jwelry case ang maong mga alahas. Igo na lamang nga nagpatabang sa Police Station 1 (PS1) sa Divisoria ang biktima human ang insidente.
Ikaduhang insidente niadtong Martes mga alas 1:30 sa hapon sa Yacapin St., ning siyudad.
Mitaho sa Police Station 2 (PS2) sa Cogon ang biktima nga mao si Maria Eva Roa-Valdehueza, 66, minyo, taga Brgy. 40 ning siyudad.
Gisaysay sa biktima nga upat ka mga babaye ang nakighigala kaniya nga sa unang pagtan-aw mga buotan og hitsura.
Daghan ang mga gihimong offer kaniya gani gidala pa kini sulod sa usa ka van ug gihinabi sa mga babaye.
Miresulta sa pagpagawas sa biktima sa iyang kwarta mobalor og P10,500; gikuha sab ang iyang cellphone mobalor og P6 mil, white gold mobalor og usa ka libo.
Human nakagawas gikan sa van ang biktima, dali sab kining milarga sakay ang upat ka mga babaye agi sa wala matinong direksiyon.
Nadumduman sa biktima nga usa sa upat ka mga babaye ang maayo og hitsura ug pution samtang ang tulo niini sakto lamang ang pamanit nga adunay katas nga 5'1" ngadto sa 5'3".
Ang kapolisan sa PS2 nga nahinabi sa Sun.Star SuperBalita niingon nga giimbestigahan pa ang kaso labina nga nibalik na usab kining maong mga babayeng grupo sa budol-budol.
Nasayran nga ang budol-budol usa ka grupo nga mang-biktima sa mga inosente labina gyod sa mga hamtong. Kini gi-operate sa usa ka con-artist diin ang mga miyembro niini maayong manulti, charismatic ug dali ra kaayo mangumbinsir sa mahimong biktima.