GIHINGUSGAN karon ang kampanya batok sa illegal nga mga siren o sa mga Tagalog pa “wangwang” sa mga sakyanan ingon man kadtong mga kusog kaayong busina nga makapakugang sa mga pedestrian human mideklarar si Presidente

Noynoy Aquino nga wa nay “wangwang.”

Updates on President Benigno Aquino III's presidency

Bisan kon ang presidente gitugotan sa paggamit og “wangwang,” nagsakripisyo siya ug iyang gidid-an ang iyang mga security escorts sa Presidential Security Group (PSG) nga di mogamit niini ug mohunong sa matag red light paingon ngadto ug pauli gikan sa Malacanang.

Daghan hinuon ang nabalaka sa seguridad sa presidente. Klaro ubos sa Presidential Decree No. 96 ug sa Land Transportation Office Memorandum niadtong 1994 nga ang gitugotan lamang sa paggamit sa mga sirena, domelights, blinkers ug susamang mga gadget mao kadtong mga sakyanan nga opisyal nga gigamit sa Armed Forces of the Philippines, Philippine National Police, Fire Protection Bureau, National Bureau of Investigation, Land Transportation Office ug hospital ambulances.

Sakmiton sa mga tinugyanan sa balaod kadtong mga illegal nga “wangwang” nga gitaod sa mga sakyanan samtang multahan ang drayber ug ang tag-iya niini.

*****

Dugang benepisyo sa mga senior citizens.

Ni-epekto sugod niadtong Martes ang hingpit nga 20 porsento nga diskwento sa mga senior citizens, kadtong nagpanuigon ug 60 anyos pataas, ubos sa Republic Act 9994, ang Expanded Senior Citizens Act of 2010.

Di na sab pabayron ang mga senior citizens sa 12 porsento nga value-added tax (VAT), busa hingpit kon tibuok 20 porsento ang ilang diskwento sa plete sa tanang sakyanan sa yuta, dagat ug kahanginan, sinehan, ingon man sa ubang mga palaliton ug mga services.

Ang mga senior citizens nga indigent makadawat usab og P500 nga pension matag buwan samtang duna usab silay 5 porsento nga diskwento kon ang ilang binuwan nga konsumo sa kuryente di molabaw sa 100 kilowatthours ug di molabaw sa 30 metro kubiko sa tubig.

Hinuon, hayan nga malangay pa ang pagpatuman niini kay gihatagan ang Bureau of Internal Revenue og laing 30 ka adlaw gikan niadtong Martes aron pagpagawas og lagda sa bag-ong exemption sa VAT.

Kadtong di motahod sa senior citizens ID nga luwatan sa Office of Senior Citizens Affairs mag-atubang sa multa nga di momenos sa P50,000 ug di molabaw sa P100,000 sa unang kalapasan.

Sa mosunod nga mga kalapasan, multa nga di momenos sa P100,000 ug di molabaw sa P200,000 ug pagkabilanggo nga di momenos sa duha ka tuig ug di molabaw sa unom ka tuig.

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya  gikan sa ala-una ngadto sa alas dos sa hapon sa sibyaan DYSS Superadyo sa RGMA network.)

(Sa mga reaksyon kanag Atty. Eddie O. Barrita: E-mail: edbarrita@yahoo.com; Cell # 09165805285; Room 201, 18 Cherry Court Bldg., Gen. Maxilom Ave., Cebu City)