HUMAN magkasungi ang mga sakop sa media og ang mga bag-ong kabinete ni Presidente Benigno Noynoy Aquino kay nangasaba naman ang iyang tigpamababa nga si Secretary Edwin Lacierda sa mga reporters kay nganong gisuna sa kalangay sa press conference sa Malakanyang ug sa nanggawas nga report sa nasayop nga Memorandum Circular Number

1. Kini wa pay labot sa gihimo sab nga pagpamanghag ni Department of Education Secretary Armin Luistro kay nasukong gipangutana labot sa pagpatuman sa programang sex education sa mga pampublikong tulunghaan.

Updates on President Benigno Aquino III's presidency

Karon si Presidente Aquino na lang intawon ang nangayo og dispensa sa gipakitang taras sa iyang mga sakop dungan ang pagpasabot kanila nga dili kontra ang mga sakop sa media, hinunua kini ang kaabag sa gobyerno sa pagpadangat og impormasyon ngadto’s gi-alagarang mga Pilipino lukop nasud.

Unya aron masegurong mawagtang ang ilang mga “first- day jitters” mao nga nahimo nila kintahay ang maong pagsinuwapang, sila gipa-ubos ni Noynoy og usa ka seminar on media handling aron mahibawo na sila unsaon sa pag-atubang ug pagpanubag sa mga sakop sa media nga kasagarang mangutana man gyud og walay lipud-lipod ngadto kanila.

Samtang talagsaon ang gipakitang pagpaubos sa Presidente sa nahimong kasaypanan sa iyang mga sakop. Apan dinhi dili usab kalikayan ang pangutana sa katawhan kon kini bang pagseminar sa iyang mga Kabinete mao ba gyud ang makapa-usab sa ilang kinaiya? Sila unta magbaton og igong uwaw ug delicadeza sa ilang gipakitang pagkamaot kay silang langaw nga nagtungtong sa buko-buko sa kabaw, milabaw pa man kay sa gitungtungang kabaw.

Ang pagka-abusado ug pagkahambugero simtomas sa hangin nga misulod sa ulo tungod sa gihuptang poder sa gobyerno. Angayang bantayan ni Noynoy nga dili lamang ang kurapsyon ang hinungdan sa problema sa nasod kon dili lakip na usab dinhi ang problema sa mga yabag nga mga nangatungdanan.

Samtang ang seminar magtudlo kanila og unsay ensaktong pamatasan apan sa katapusan sila da gihapon ang mohimo sa desisyon kun motahod ba og magpatahud sila sa ilang opisina?

Dili naman usab makonsiderar nga kuwang sa kabuot kining mga tawhana, gani sila gipili man ni Noynoy sa pag-asumir sa maong mga importanteng katungdanan kay siya nagatuo nga aduna sila’y igong intelehente nga kapasidad ug katakos sa paghatag og ensaktong panerbisyo sa mga Pilipino.

Apan unsaon man nato ang ilang kaalam kon ugaling wala sila’y ensaktong pamatasan? Mientras sayo pa man tingali nga sila atong hukman kay lagi sila angayang hatagan pa og laing kahigayonan kay hataas pa ang atong latason nga mosunod nga unom ka tui nga pagpangatungdan.

Hinaut nga si Noynoy magmata ug andam molapdus sa iyang mga sakop sa umaabot pang mga milagro kay kita sayod nga ang sungay nga tinaguan dili maputol sa usa lamang ka seminar. Kay samtang si Noynoy mipasalig sa mga tawo nga kamo ang akong Boss! Ang iyang mga sakop mao may gustong ilhong boss sa katawhan. Kini og dili mapitol maoy babag sa atong gimithing kausaban.