HUMANA tuod ang eleksiyon ug nakalingkod na ang ubang mga napiling opisyal. Apan ang lungsod sa Compostela puwerti pang gubuta. Kini human ang second division sa Commission on Elections (Comelec) mi-anular sa proklamasyon sa mga mananaog nga gipanguluhan ni Mayor-elect Joel Quino. Ang lakang sa Comelec nunot usab sa petisyon sa naparot nga mayor nga si Richie Wagas.
Misang-at og motion for reconsideration ang kampo ni Quino. Kay gi-anular man, sa ato pa walay angayan nga molingkod sa puwesto ug magpadagan sa renda sa pangagamhanan. Mao nga gi-designate una si Regional Director Pedro Noval sa Department of Interior and Local Government (DILG 7) isip care taker. Kini aron dili mabalda ang batakang serbisyo.
MI-INSISTER
Temporaryo ra ang paglingkod ni Noval diha hangtod nga makapagawas na ang Comelec og desisyon. Apan mi-insister gayod si Quino nga molingkod kay siya gayod kuno ang gipili sa katawhan. Pastilan si Quino pagkamabaw og utok.
Nganong dili man siya motuman sa kamanduan sa Comelec ug DLIG. Dili man boang na si Noval nga molingkod og walay mando sa iyang labaw. Gani si Gov. Gwen Garcia man ang nagpahural kang Noval.
Nganong dili man makahuwat si Quino nga maresulbar kining maong isyo ug makapanaog na ang Comelec og resolusyon.
Dili man kini magdugay ba. Morag hilas ra kaayo kadtong iyang gi-ingon nga andam siyang magpapriso basta molingkod gayod siya. Kay sa tulisukon siya sa iyang mga konstituwente nganong iya silang gibiyaan. Pastilan, dugay ra namatay ang atong nasudnong bayani nga si Dr. Jose Rizal, Mayor Quino.
SUPPORTERS
Ang nakaparat pod aning kampo ni Wagas kay wala makabadlong sa iyang mga sumusunod nga nagtapok sa munisipyo. Kinsa man ang nagsugo nila nga moanha diha? Gipamayran o gipaka-on silang Wagas? Ang panag-abot sa mga supporters sa duha ka kampo, maoy nakapabilo sa tensiyon sa maong lungsod. Diha nay nagsinuntukay o nagnilabayay og bato.
Maayo siguro nga manduan nila ni Wagas ug Quino ang ilang mga sumosunod nga dili lang magtapok diha sa munisipyo aron malikayan ang kagubot. Total atoa naman kining ilang isyo sa proper body. Way mahimo kanang ilang sumosunod diha bisan og mag-People Power na sa mamahimong desisyon sa Comelec. Pagbaton mo og kalinaw.
(bobby@sunstar.com.ph)