TULO ka tawo naangol human nagsampok ang duha ka mga single nga motorsiklo didto sa Purok 1, Barangay Cabidianan, lungsod sa Nabunturan, Comval Province pasado alas 7:15 sa gabii niadtong Lunes.
Nailhan ang tulo ka mga biktima nga mao sila si Mark Anthony Posadas, hamtung ang panuigon, ug molupyo sa Purok 1, Barangay Cabidianan; Benidicto Bucane, molupyo sa Barangay Linoan, lungsod sa Montevista; ug si Nolife Saludes, hamtung ang panuigon, ug molupyo sa Purok 3, lungsod sa Nabunturan.
Sa report gikan sa Comval Province Police Provincial Office nasayran nga nagmaneho sa iyang Motorstar nga motor si Bucane nga dunay plate number YD-1714, angkas niya ang laing biktimang si Saludes, samtang si Posadas nagmaneho sab sa iyang Honda TMX nga motor nga dunay plate number 6447-LK nagkabangga.
Si Posadas matud pa gikan sa Barangay Poblacion lungsod sa Nabunturan padulong sa Barangay Cabidianan ug pag-abot sa nahisgutang dapit, mibangga siya sa kasugat nga motor nga gisakyan sa laing duha ka mga biktima.
Tungod sa kakusog sa impak nangalagpot ang mga sakay resulta sa pagkahiagum nila og mga pangos ug bun-og sa kalawasan human nabagnos sa sementong dalan.
Daling gipangdala sa Davao Regional Hospital ang mga biktima aron mapatambalan, samtang ang ilang tagsa-tagsa ka mga motor gikostudiya na sa kapulisan.
Mga sakop sa trafiic section sa Nabunturan Municupal Police Station mihimo na og dugang imbestigasyon sa hitabo. (Marvin Pineda)