DUHA ka lalaki nga naghupot og granada ug pinaugang dahon sa marijuana nadakpan sa hiniusang puwersa sa mga sakop sa 39th Infantry Battalion, 10th Infantry Division ug Citizen Armed Forces Geographical Unit (Cafgu) sa Philippine Army didto sa lungsod sa Malita, Davao del Sur.
Nangulo sa operasyon mao si Lieutenant Reyan Lugatoc didto sa Sitio Lalon, Barangay Little Baguio, mga alas 5 sa hapon, Martes, hinungdan sa pagkasikop sa mga suspek.
Giila ang dinakpan nga mao sila si Benio Caray alyas Jojo, 28 ug taga Barangay Upper Suyan, lungsod sa Malapatan, sa probinsiya sa Sarangani ug si Karot Sumanday alyas Johnny Boy, 20, ug taga Sitio Lanulan sa maong lugar.
Apan sa gihimong imbestigasyon, nasayran nga ang duruha mga sakop sa Platoon Mazda sa Group Front 71 sa mga rebeldeng New People's Army (NPA).
Nagmalampuson ang mga otoridad sa pagsikop kanila human gipindotan bahin sa presensiya sa mga suspek sa mga sakop sa Barangay Defense System (BDS) sa maong dapit.
Nakuha gikan sa posisyon ni Caray ang usa ka fragmentation grenade samtang gikan ni Sumanday mao ang mga gipaugang dahon sa gituohang marijuana.
Matod ni Lugatoc, giputos og mantalaan ang druga nga ilang nakuha sa posisyon sa suspek.
Nakig-alayon dayon ang militar ngadto sa kapulisan ug mga dinakpan gidala sa buhatan sa Criminal Investigation and Detection Team kinsa maoy niduso og kaso ngadto sa buhatan sa piskalya sa dakbayan sa Digos. (Dondon Dinoy)