SA pagkapili ni Noynoy Aquino pagka-presidente sa nasod, ang kausaban sa pagpadagan sa kagamhanan maoy nakulit sa alimpatakan sa kinabag-an.
Ang kahingutas sa pag-antos sa yutang Pilipinhon sa nabaniog nga korapsyon ug ubang kahiwian sa niaging administrasyon, gituohan nga mahinayhinay na sa pagkapapas ug ngadto sa ngadto mawagtang na sa dayon.
Uban ning maong paglaom mao ang pag-ayuda sa mga sinaligan ug Kabinete ni Aquino kinsa gituohan nga sangkap sa kaligdong ug kamatinud-anon.
Apan sukwahi sa napangagpasan, sa unang mga adlaw pa lamang daw sa misubaw gilayon ang ka arogante sa iyang pipila ka mga kabinete.
Pananglitan, kining duha nga naghupot og sensitibong posisyon – si Edwin Lacierda, ang presidential spokesman, ug ang DepEd secretary nga si Armin Luistro – nga miluwat gilayon og bati nga mga pamulong ngadto sa mga media.
Si Lacierda naglikaylikay kay nahadlok nga pangutan-on kalabot sa kontrobersiyal sa nagkatuis nga memorandum circular sa presidente, samtang si Luistro yanong mipadungog sa mga tigbalita nga di na angay mangutana kalabot sa sex education kay ang mga media way ikatabang sa maong isyu.
Kini maoy nakapaalarma sa media nga inay motug-an sila sa katawhan kon unsa gayud ang kamatuoran mora na man hinuon og sila adunay gitago-an.
Gibakwi sa presidente ang ilang binuhatan. Siya na mismo ang nangayo’g pasaylo sa nabuhat sa iyang mga tawo, butang nga salikwaot kaayo paminawon.
Imbis iyang pahamatngunan, pasidan-an o kasab-an, daw siya na hinuon ang miangkon sa ilang kasal-anan. Lahing klase sa liderato.