USA ka negusiyante grabe ang kahimtang human gitulis ug giluba alas 5:00 sa hapon niadtong Martes didto sa siyudad sa Cotabato.

Nailhan ang biktima sa kapulisan nga mao si Sacar Aminola, 46, minyo, buy and sell trader ug molupyo sa Nayon Sharief.

Sigun sa nahagpat nga taho gikan sa Cotabato City Police Office nga naglakaw ang biktima gikan sa iyang tindahan sa dalang Bonifacio sa maong dapit apan giatngan sa duha ka wala mailhing armadong lalaki.

Nagdeklara og hold-up ang mga suspetsado, apan misulay sa pagsukol si Aminola hinungdan nga gidunggab siya.

Gikuha sa mga tulisan ang pitaka sa biktima nga dunay sulod nga P15 mil ug ang iyang cellphone.

Sumala pa sa taho nga una misibat ang mga suspek, gipusil pa nila si Aminola gamit ang kalibre .45 nga pistola.

Dali nga gisapupo ang negusiyante sa mga pulis ug gidala sa Cotabato Regional and Medical Center nga anaa sa malisud nga kahimtang human nahiagum og samad dinunggaban sa tiyan ug pinusilan sa likod.

Kapulisan padayong misusi sa hitabo aron mailhan ug madakpan ang mga suspetsado. (Edgardo Fuerzas)