SA EDAD nga singkuwentay dos daghan na kog sakit. Hypertension, tortuous aorta, deformed ribs ug poly sinusitis. Kining tanan naa nako. Mao nga dihang idestino na ko sa among labaw adto didto sa Angeles City Branch, mihangyo ko nga dili lang unta idayon.

Apan bisan pa sa gipakitang mga resita sa tambal nga akong gitomar kada adlaw ngadto sa among Boss, bisan pa sa letter

request for retention nga akong gitunol, wa gyud ako paminawa.

Updates on President Benigno Aquino III's presidency

Hinungdan nga naasayin gayud ako sa Angeles City. Gibilin ko ang akong pamilya dinhi sa Sugbo ug mao ray akong gikakuyog ang novena pocketbook ni Sr. Sto. Niño. Siya man god kanunay ang gihimo kong gabayan sa bisan asang dapit ning kalibutan ako idagsa sa panahon. Sa laktod, gisalig ko Kaniya ang tanan.

Nagpasalamat ako nga ang staff house nga akong gi-estaran duol rag simbahan. Kada Biyernes basta dili lang ilugon sa akong trabahoan ang eskedyul sa misa, motambong gyud ako. Ug makig-estorya Kaniya.

Usahay, tungod sa usab-usab nga eskedyul sa among trabaho, dili ako makasimba kay gabii na man kaayo akong mahiuli sa staff house. Apan wala kini makaputol sa akong pakighinabi Kaniya.

Sanglit sa dili pa ako matulog, ukbon man nako ang Iyang novena pocketbook ug kinasingkasing nga basahon agig pag-ampo.

USA ka gabii niana, hago kaayo akong lawas kay gipa-obertayim kog utso oras sa among trabahoan. Kini ra bang mga sakit nga mitakboy nako nagkinahanglag hustong pahulay. Pastilan, wala na ra ba ko moinom og tambal sa hypertension sukad niadtong gisultian ko sa ig-agaw nga doktor sa among kauban nga makadaot sa liver ug kidney ang pagpunayg inom niining medisinaha.

Hinuon nag-low diet na ako ug nagsigeg ehersisyo. Mao nga medyo kompiyansa na sa kondisyon sa akong panglawas. Ug nakalimtan na lang ang pahimangno sa among company doctor nga ang pagbiya kog inom sa tambal sa kolesterol delikado kuno kaayo kay gikonsiderar ko niya nga walking time bomb. Anytime, atakihon sa hayblad, o sakit ba sa kasingkasing.

Gumikan sa tumang kalapoy, dali ra kong nahikatulog. Straight.

Apan sa tunga-tunga sa akong pagkatulog nagpuot akong dughan.

Nagkaanam kinig kasakit – nianang matang sa sakit nga sakit gyud kaayo. Hangtod nga akong nabatyagan nga naputol ang akong pagginhawa.

Kay nagtuo nga mamatay na ko, dali kong gisangpit si Sr. Sto. Niño ug giingnan: Intawon Batang Hesus, oh, Ginuo ko, pasayloa ako sa tanang kong sala!”

Human matuaw sa akong hunahuna ang maong mga pulong, nadugtong pag-usab ang akong pagginhawa nga tingali mikabat sa utso segundos nga nawala kanako.

KARON nahibalik na ako dinhi sa Cebu Branch. Ug matag Biyernes mokuyog gayud ako sa mga deboto ni Sr. Sto. Niño sa pagsimba agig dakong pasalamat ning bag-ong kinabuhi nga iyang gihatag kanako niadto mismong takna nga gisangpit ko Siya. (KATAPUSAN)