2 ka tawo gitulis

DUHA ka mga tawo nga mangomprahay og baboy ang gitulis sa tulo ka mga tawo sa alas 11:00 sa buntag niadtong Martes didto sa Barangay Sirawan, distrito sa Toril, siyudad sa Davao.

Gitulis mao sila Edgardo Lim, 49, minyo ug nagpuyo sa Barangay San Antonio, Agdao, ug Amelito Olden, 38, minyo, matadero ug nagpuyo sa Barangay Duterte, Agdao.

Si SPO4 Isidro Templa, imbestigador sa Toril Police Station, nagbutyag nga ang mga biktima padulong unta mangompra og baboy apan giatangan sila sa tulo ka mga tawo didto sa Barangay Sirawan.

Matud ni Templa nga gitionan og armas ang mga biktima dungan sa pagdeklara og hold-up mao nga napugos sila pagtunol sa salapi nga nagkantidad og P115,000.

Mga biktima nagbutyag sa kapulisan nga ilang gihatag ang ilang salapi sa mga tulisan aron dili sila pasakitan niadtong higayona.

Sila Lim ug Olden nagsulti nga human milampos ang mga tulisan sa ilang tinguha dali silang misakay og motorsiklo nga walay plate number paingon ngadto sa wala masayri nga lugar.

Sa pagsusi sa kapulisan sa crime scene, ilang nahipus ang usa ka sumapak (improvised hand gun) nga wala nay bala nga gibilin sa mga tulisan.

Si Police Senior Inspector Romeo Abler sa Toril Police Station nagmando karon sa iyang mga sakop nga maniid sa maong lugar aron masayran kung kinsa ang mga tawo nga mitulis sa mga biktima.

Sa samang adlaw, sigun sa impormasyon nga nahipus sa SuperBalita gikan sa Talomo Police Station, dunay gitulis nga negusyante sulod sa iyang sakyanan nga giparada duol sa Dencio's Hilltop, Barangay Langub.

Mga biktima giingon nga gitionan sa upat ka mga tawo ug gikuha ang ilang mga mahalong cellphone, camera ug mga personal nga butang.

Sa wala pa mibiya ang mga tulisan, gibuslotan pa ang ligid sa sakyanan sa biktima dayon misakay sa motorsiklo padung sa wala masayri nga lugar. (Alger Dura)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph